વડોદરા શહેરના અકોટા અને માંજલપુર વિસ્તારમાં નવા સ્વિમિંગ પુલોના નિર્માણ માટે સ્થાયી સમિતિમાં દરખાસ્ત રજૂ કરવામાં આવી છે. વડોદરા મહાનગરપાલિકા દ્વારા આ બંને સ્વિમિંગ પુલો રૂપિયા 24 કરોડથી વધુના ખર્ચે બનાવવાની યોજના છે.
અકોટામાં સ્વિમિંગ પુલની દરખાસ્ત
મહાનગરપાલિકાની સ્થાયી સમિતિ સમક્ષ રજૂ થયેલી દરખાસ્ત મુજબ, પશ્ચિમ ઝોનના અકોટા તથા આસપાસના વિસ્તારમાં રહેતા આશરે 4.50 લાખ લોકોને સ્વિમિંગ પુલની સુવિધા મળી રહે તે હેતુસર આ યોજના તૈયાર કરવામાં આવી છે. અકોટા વિસ્તારમાં કુલ 23,202 ચોરસ મીટર પ્લોટમાંથી અંદાજે 7,000 ચોરસ મીટરમાં મુખ્ય સ્વિમિંગ પુલ, 151 ચોરસ મીટરમાં બેબી સ્વિમિંગ પુલ અને બાકીના વિસ્તારમાં રોડ તથા પાર્કિંગ સુવિધા સાથે આધુનિક સ્વિમિંગ પુલ બનાવવાનું આયોજન છે.
માંજલપુરમાં પણ સ્વિમિંગ પુલની દરખાસ્ત
તે જ રીતે શહેરના દક્ષિણ ઝોનમાં માંજલપુર તથા તેની આસપાસના આશરે 5 લાખ લોકોને સ્વિમિંગ પુલની સુવિધા મળી રહે તે માટે માંજલપુર સ્મશાનની સામે આવેલી જમીન પર નવું સ્વિમિંગ પુલ બનાવવાની યોજના રજૂ કરવામાં આવી છે. દક્ષિણ ઝોનમાં આવેલી 13,366 ચોરસ મીટર જમીનમાંથી અંદાજે 6,462.95 ચોરસ મીટરમાં નવિન સ્વિમિંગ પુલનું નિર્માણ કરવાનું આયોજન છે.
સ્વિમિંગ પુલો માટે સ્વર્ણિમ ગ્રાન્ટ વર્ષ 2023-24 હેઠળ ફાળવણી
પશ્ચિમ અને દક્ષિણ ઝોનમાં બનનાર આ સ્વિમિંગ પુલો માટે સ્વર્ણિમ ગ્રાન્ટ વર્ષ 2023-24 હેઠળ ફાળવણી કરવામાં આવી છે. દરખાસ્ત મુજબ, બંને સ્વિમિંગ પુલોમાં ટ્રેનર રૂમ, સ્ટોર રૂમ, એડમિન ઓફિસ, લેડીઝ અને જેન્ટસ માટે લોકર રૂમ તથા ચેન્જિંગ રૂમ, શાવર એરિયા, પંપ રૂમ, ફિલ્ટર પ્લાન્ટ ઉપરાંત યોગ અને મેડિટેશન સેન્ટર તેમજ જીમની સુવિધા પણ ઉપલબ્ધ કરાવવામાં આવશે.
આ પણ વાંચો---- Aravallis Hills: હવે કોઈ નવા ખાણકામની મંજૂરી નહીં, સંરક્ષિત ક્ષેત્રનો પણ વિસ્તાર કરાશે, વિવાદ વચ્ચે કેન્દ્ર સરકારનો મહત્વનો નિર્ણય
