ગઈ તારીખ 22 ના રોજ વડોદરાની પ્રસિદ્ધ એમ.એસ. યુનિવર્સિટીમાં અભ્યાસ કરતો વિદ્યાર્થી જગદીશ તિવારી પોતાનું બુલેટ લઈને પસાર થઈ રહ્યો હતો. આ દરમિયાન ફરજ પર તૈનાત ટ્રાફિક કોન્સ્ટેબલ કિરણ જોગદિયા અને TRB જવાન યશપાલ સિંધાએ તેને અટકાવ્યો હતો. પોલીસકર્મીઓએ બુલેટના સાયલેન્સર બાબતે નિયમોનું ઉલ્લંઘન હોવાનું જણાવી વિદ્યાર્થીને કાયદાકીય કાર્યવાહીની ધમકી આપી હતી.
3000 પડાવ્યા અને ખોટો મેમો આપ્યો
વિદ્યાર્થીને ડરાવી-ધમકાવીને આ બંને પોલીસકર્મીઓએ તેની પાસેથી ₹3,000 ની રોકડ રકમ પડાવી લીધી હતી. આટલેથી ન અટકતા, પોતાની કામગીરી કાયદેસર બતાવવા માટે તેમણે વિદ્યાર્થીના નામે ₹500 નો ખોટો મેમો પણ જનરેટ કરી આપ્યો હતો. આ પ્રકારની ખુલ્લેઆમ ઉઘાડી લૂંટથી હેબતાઈ ગયેલા વિદ્યાર્થીએ હિંમત દાખવીને આ અન્યાય સામે અવાજ ઉઠાવવાનું નક્કી કર્યું.
