વડોદરા શહેરના મકરપુરા વિસ્તારમાં જાહેર માર્ગ પર બબાલ અને મારામારી કરનાર 7 યુવકોની મકરપુરા પોલીસે ધરપકડ કરી છે. આ સમગ્ર મામલો શાળામાં અભ્યાસ કરતાં બે બાળકો વચ્ચેના સામાન્ય ઝઘડાને કારણે વકર્યો હતો. પ્રાપ્ત માહિતી અનુસાર, શાળામાં ભણતા બાળકો વચ્ચે કોઈ બાબતે ઝઘડો થયો હતો. આ ઝઘડાની જાણ થતાં બંને બાળકોના મોટા ભાઈઓ અને તેમના સાગરીતો ગત તારીખ 26મી નવેમ્બરના રોજ મકરપુરા વિસ્તારમાં એકઠા થયા હતા.
જાહેરમાં બબાલ કરનાર 7 યુવકોની ધરપકડ
શરૂઆતમાં આ યુવકો વચ્ચે માત્ર બોલાચાલી થઈ હતી, પરંતુ મામલો ઉગ્ર બનતા વાત મારામારી સુધી પહોંચી ગઈ હતી. જાહેર માર્ગ પર યુવકોનો આ ઝઘડો જોઈને સ્થાનિક લોકો પણ એકઠા થઈ ગયા હતા.ઘટનાની જાણ થતાં મકરપુરા પોલીસ સ્ટેશનનો સ્ટાફ તાત્કાલિક સ્થળ પર પહોંચ્યો હતો અને જાહેર શાંતિનો ભંગ કરવા બદલ કુલ સાત યુવકોની ધરપકડ કરી હતી.
