વડોદરામાં કાયદો અને વ્યવસ્થાની સ્થિતિ સામે સવાલો ઉભા કરતો એક ચોંકાવનારો કિસ્સો પ્રકાશમાં આવ્યો છે. શહેરના કલાલી વિસ્તારમાં એક યુવકની ચપ્પાના ઉપરાઉપરી ઘા ઝીંકીને ઘાતકી હત્યા કરવામાં આવી છે. આ લોહિયાળ ખેલને પગલે સમગ્ર વિસ્તારમાં ભારે ચકચાર મચી ગઈ છે પ્રાથમિક માહિતી અનુસાર, આ ઘાતક હુમલો જૂની અને અંગત અદાવત રાખીને કરવામાં આવ્યો હોવાનું સામે આવ્યું છે.
હુમલાખોરોએ તેને રસ્તામાં આંતર્યો
મળતી વિગતો મુજબ, મૃતક યુવકની ઓળખ ગિરીશ ભાલીયા તરીકે થઈ છે. ગિરીશ મોડી રાત્રે એક ધાર્મિક પ્રસંગમાં હાજરી આપીને પોતાના ઘર તરફ પરત ફરી રહ્યો હતો. આ દરમિયાન કલાલી વિસ્તારમાં અગાઉથી જ ઘાત લગાવીને બેઠેલા હુમલાખોરોએ તેને રસ્તામાં આંતર્યો હતો. કંઈ પણ સમજાય તે પહેલાં જ હુમલાખોરોએ ગિરીશ પર તીક્ષ્ણ હથિયાર વડે આડેધડ હુમલો કરી દીધો હતો. ગિરીશના શરીર પર ચપ્પાના અસંખ્ય ઘા ઝીંકવામાં આવ્યા હતા, જેના કારણે તે લોહીલુહાણ હાલતમાં જમીન પર ઢળી પડ્યો હતો અને તેનું ઘટનાસ્થળે જ કમકમાટીભર્યું મોત નીપજ્યું હતું.
