નવા શૈક્ષણિક સત્રની શરૂઆત પહેલા જ વડોદરાના વાલીઓ માટે અત્યંત ચિંતાજનક અને ખિસ્સા હળવા કરનારા સમાચાર સામે આવ્યા છે. મોંઘવારીના આ યુગમાં હવે બાળકોને શાળાએ મોકલવા વધુ મોંઘા સાબિત થશે. વડોદરા સ્કૂલ વેન એસોસિએશન દ્વારા સ્કૂલ વાહનોના માસિક ભાડામાં તોતિંગ વધારો ઝીંકવાનો સત્તાવાર નિર્ણય લેવામાં આવ્યો છે, જેને પગલે મધ્યમવર્ગીય પરિવારોના ઘરનું બજેટ ખોરવાઈ જવાની પૂરેપૂરી શક્યતા છે.
આકરો નિર્ણય લેવાયો
સ્કૂલ વેન એસોસિએશનના પ્રમુખ જીવન ભરવાડ અને અન્ય વાહન ચાલકોની મળેલી બેઠકમાં આ આકરો નિર્ણય લેવાયો છે. વડોદરામાં આગામી 8 જૂનથી જ નવું ભાડું અમલી બની જશે. નવી જાહેરાત અનુસાર, વાહન અને અંતરના આધારે વિદ્યાર્થી દીઠ રૂપિયા 100થી લઈને રૂપિયા 400 સુધીનો તોતિંગ વધારો ફટકારવામાં આવશે. હાલમાં વડોદરામાં વાલીઓ વિદ્યાર્થી દીઠ મિનિમમ 700થી 750રૂપિયા જેટલું માસિક ભાડું ચૂકવી રહ્યા છે, જેમાં હવે મોટો વધારો થવા જઈ રહ્યો છે. આ નિર્ણય હેઠળ સ્કૂલ વેનમાં વિદ્યાર્થી દીઠ 100 રૂપિયા અને સ્કૂલ બસના ભાડામાં 400 રૂપિયા સુધીનો ધરખમ ભાવ વધારો તોળાઈ રહ્યો છે.