રંગોના પર્વ ધૂળેટીના દિવસે વલસાડ શહેરમાં માનવતાને શર્મસાર કરતી એક ઘટના સામે આવી હતી. રસ્તા પર ઓવરટેક કરવા જેવી નજીવી બાબતે નશામાં ધૂત બે યુવકોએ એક નિર્દોષ વૃદ્ધ ખેડૂતને જાહેરમાં માર માર્યો હતો. આ સમગ્ર ઘટનાનો વીડિયો સોશિયલ મીડિયા પર વાયરલ થતાં લોકોમાં ભારે રોષ જોવા મળ્યો હતો, જેના પગલે વલસાડ સીટી પોલીસે કડક કાર્યવાહી કરી છે.
નશામાં ધૂત બે યુવકોએ એક નિર્દોષ વૃદ્ધ માર માર્યો
નવસારી જિલ્લાના કછોલી ગામના વતની અને વ્યવસાયે ખેડૂત એવા વૃદ્ધ જ્યારે વલસાડમાંથી પસાર થઈ રહ્યા હતા, ત્યારે ઓવરટેક કરવા બાબતે બે યુવકો સાથે તેમની બોલાચાલી થઈ હતી. નશાની હાલતમાં રહેલા આ યુવકોએ વિવેક ગુમાવીને વૃદ્ધને રસ્તા પર જ બેરહેમીથી માર મારવાનું શરૂ કર્યું હતું. આ દ્રશ્યો મોબાઈલ કેમેરામાં કેદ થઈ ગયા હતા અને જોતજોતામાં વીડિયો વાયરલ થયો હતો.
