મહેસાણા જિલ્લાના ઊંઝા ખાતે APMC (APMC) નજીક આવેલો રેલવે ઓવરબ્રિજ નિર્માણના માત્ર 7 જ વર્ષમાં અત્યંત જર્જરિત હાલતમાં પહોંચી ગયો છે. બ્રિજના મુખ્ય રોડ પરથી લોખંડના સળિયા બહાર નીકળી આવતાં વાહનચાલકો અને સ્થાનિકો માટે મોટો ખતરો ઊભો થયો છે. કરોડોના ખર્ચે તૈયાર કરાયેલા આ બ્રિજની આટલા ટૂંક સમયમાં આવી દશા થતાં તેના નિર્માણની ગુણવત્તા સામે ગંભીર સવાલો ઊભા થયા છે. તંત્ર દ્વારા યોગ્ય સમારકામ કરવાને બદલે માત્ર નામમાત્રના થીંગડાં મારીને સંતોષ માનવામાં આવી રહ્યો હોવાનો આરોપ લાગી રહ્યો છે.
APMC અને માં ઉમિયાના દર્શનાર્થે આવતા લાખો શ્રદ્ધાળુઓ માટે ચિંતા
આ રેલવે ઓવરબ્રિજ ઊંઝા APMCની બિલકુલ બાજુમાં આવેલો હોવાથી અહીંથી રોજેરોજ મોટા માલવાહક વાહનો અને ટ્રકોની સતત અવરજવર રહે છે. આ ઉપરાંત, જગતજનની માં ઉમિયાના દર્શનાર્થે ઊંઝા આવતા દેશ-વિદેશના લાખો શ્રદ્ધાળુઓ પણ આ જ બ્રિજ પરથી પસાર થતાં હોય છે. રસ્તા પર ખુલ્લા દેખાતા સળિયાના કારણે વાહનોના ટાયર ફાટવા કે વાહનચાલકો સ્લિપ થઈને અકસ્માતનો ભોગ બનવાની ભીતિ સેવાઈ રહી છે. છતાં પણ તંત્ર દ્વારા કોઈ મોટો અકસ્માત સર્જાય તેની રાહ જોવાઈ રહી હોય તેમ લાગી રહ્યું છે.