Modasa માં ચોપડા રોડ પર ગમખ્વાર અકસ્માત, શ્રી આદર્શ વિદ્યાલયની બસ પલટી, બાળકોને હોસ્પિટલે ખસેડાયા

મોડાસા-ચોપડા રોડ પર એક ગમખ્વાર અકસ્માત થયો છે, જેમાં શ્રી આદર્શ વિદ્યાલયની એક સ્કૂલ બસ પલટી મારી ગઈ હતી. આ બસ લીંભોઈથી આવી રહી હતી અને તેમાં લગભગ 30 જેટલા વિદ્યાર્થીઓ સવાર હતા. ઘટનાની પ્રાથમિક વિગતો મુજબ, બસના ડ્રાઈવરે સામેથી આવતા વાહનને સાઈડ આપવા જતાં સ્ટીયરિંગ પરનો કાબૂ ગુમાવ્યો હતો અને બસ રોડની સાઈડમાં પલટી મારી ગઈ હતી. અકસ્માતને પગલે વિદ્યાર્થીઓ વચ્ચે ગભરાટનો માહોલ ફેલાયો હતો અને ચીસાચીસ સાંભળીને આસપાસના લોકો ઘટનાસ્થળે દોડી આવ્યા હતા.

વિદ્યાર્થીઓને બહાર કાઢવાની કામગીરી શરૂ કરી

અકસ્માત બાદ સ્થાનિક લોકો અને રાહદારીઓએ તાત્કાલિક બસમાં ફસાયેલા વિદ્યાર્થીઓને બહાર કાઢવાની કામગીરી શરૂ કરી હતી. સદનસીબે, કોઈ મોટી જાનહાનિ થઈ નથી, પરંતુ બસમાં સવાર મોટાભાગના વિદ્યાર્થીઓને નાની-મોટી ઈજાઓ પહોંચી છે. અકસ્માતની જાણ થતાં જ પોલીસ અને 108 એમ્બ્યુલન્સની ટીમ ઘટનાસ્થળે પહોંચી ગઈ હતી. તમામ ઈજાગ્રસ્ત વિદ્યાર્થીઓને તાત્કાલિક સારવાર માટે મોડાસાની સાર્વજનિક હોસ્પિટલમાં ખસેડવામાં આવ્યા છે, જ્યાં તેમની સારવાર ચાલી રહી છે.

વાલીઓમાં ભારે ચિંતાનો માહોલ સર્જાયો

આ ઘટનાથી વાલીઓમાં ભારે ચિંતાનો માહોલ સર્જાયો છે. તેઓ પોતાના બાળકોની ખબર પૂછવા માટે મોટી સંખ્યામાં હોસ્પિટલ ખાતે પહોંચ્યા હતા. આ ઘટના ફરી એકવાર સ્કૂલ બસની સલામતી અને સુરક્ષા અંગે ગંભીર પ્રશ્નો ઊભા કરે છે. તંત્ર દ્વારા આ મામલાની ગંભીરતાથી તપાસ થવી જોઈએ અને ભવિષ્યમાં આવા અકસ્માતો ન બને તે માટે સ્કૂલ બસના ડ્રાઈવરોની યોગ્ય તાલીમ અને બસની જાળવણી પર વધુ ધ્યાન આપવું જોઈએ.