સાબરકાંઠા જિલ્લા સહિત સમગ્ર ઉત્તર ગુજરાતના બટાકા પકવતા ખેડૂતોએ ખાનગી કોન્ટ્રાક્ટ ફાર્મિંગ કંપનીઓ સામે આક્રમક વલણ અપનાવ્યું છે. હિંમતનગર ખાતે સાબરકાંઠા, અરવલ્લી અને બનાસકાંઠા જિલ્લાના બટાકા ઉત્પાદક ખેડૂતોની એક ખાસ અને મહત્વપૂર્ણ બેઠક યોજાઈ હતી. આ બેઠકમાં ત્રણેય જિલ્લાના ખેડૂતોએ એકજૂથ થઈને બટાકાનું વિતરણ અને કોન્ટ્રાક્ટ કરતી ખાનગી કંપનીઓ સામે આરપારની લડત લડવાના એંધાણ આપ્યા છે. ખેડૂતોએ એકસૂરે કંપનીઓ દ્વારા થતી લૂંટ અને અન્યાયી નીતિઓ બંધ કરવા માગ કરી છે.
100 કિલોએ 1.6 કિલોની ગેરકાયદે કપાત બંધ કરવા સહિત 4 કડક માગણીઓ
હિંમતનગરની બેઠકમાં ખેડૂતોએ ખાનગી કંપનીઓ સામે 4 મુખ્ય અને કડક માંગણીઓ મૂકીને અલ્ટીમેટમ પાઠવ્યું છે. ખેડૂતોની મુખ્ય માગણી છે કે વજનમાં 100 કિલોએ 1 કિલો 600 ગ્રામની કરાતી ગેરકાયદેસર કપાત તાત્કાલિક અસરથી નાબૂદ કરવામાં આવે. આ ઉપરાંત પાકની ખરીદી વખતે ગાડીમાં માલ ભરવાની મજૂરી પંચ કે કંપની પોતે ચૂકવે, કુદરતી હોનારત કે વાતાવરણના બહાના કાઢીને ભાવમાં કાપ મૂકવાની અન્યાયી નીતિ બંધ થાય અને ડીઝલ, ખાતર તથા દવાના વધતા ભાવ સામે ખેડૂતોને પાકનો વ્યાજબી ભાવ આપવામાં આવે.