Aravalli News : મેઘરજમાં વરસાદી આફત, અડધો કલાલમાં 1.5 ઇંચ વરસાદથી રસ્તાઓ પાણીમાં ગરકાવ

અરવલ્લી જિલ્લામાં મેઘરાજાએ જોરદાર બેટિંગ કરી છે. માલપુર નગર અને તેની આસપાસના વિસ્તારોમાં એટલો ધોધમાર વરસાદ વરસ્યો કે રાજમાર્ગો પર નદી જેવો માહોલ સર્જાઈ ગયો. નગરના ગણેશ પંડાલ પણ આ વરસાદમાં ભીંજાયા હતા. આ ઉપરાંત, મોરડુંગરી, જેશીંગપુરા, અંબાવા અને કોયલીયા ગામમાં પણ ભારે વરસાદ થયો હોવાના અહેવાલ છે. આ વરસાદને કારણે વાતાવરણમાં ઠંડક પ્રસરી છે અને ખેતી માટે આશીર્વાદરૂપ સાબિત થયો છે.

મોડાસા, શામળાજી અને મેઘરજમાં જળબંબાકાર

જિલ્લાના અન્ય વિસ્તારોમાં પણ ભારે વરસાદ જોવા મળ્યો છે. મોડાસા શહેરમાં ધોધમાર વરસાદથી અનેક વિસ્તારોમાં પાણી ભરાયા હતા. શામળાજી મંદિરમાં જતા મુખ્ય માર્ગ પર પણ પાણી ભરાતા વાહનચાલકો અને દર્શનાર્થીઓને હાલાકીનો સામનો કરવો પડ્યો હતો. મેઘરજમાં માત્ર અડધા કલાકમાં દોઢ ઇંચ જેટલો વરસાદ પડ્યો હતો, જેના કારણે મુખ્ય માર્ગો, આંબાવાડી રોડ, ગાયત્રી અને નવજીવન સોસાયટી જેવા નીચાણવાળા વિસ્તારોમાં પાણી ભરાયા હતા.

સ્થાનિકોની હાલાકી અને રાહત

જોકે આ વરસાદ ખેતી માટે સારો ગણાય, પરંતુ શહેર અને ગામડાના રસ્તાઓ પર પાણી ભરાઈ જવાથી સ્થાનિકોની હાલાકી વધી ગઈ હતી. ખાસ કરીને વાહનચાલકોને પાણી ભરાયેલા રસ્તાઓ પરથી પસાર થવામાં મુશ્કેલી પડી હતી. આમ છતાં, લાંબા સમય બાદ થયેલા આ સારા વરસાદને કારણે લોકોમાં ખુશી જોવા મળી રહી છે, કારણ કે આ વરસાદથી જળાશયો અને તળાવોમાં પાણીની આવક થશે.

મેઘરજના પીસાલ અને ઇપલોડા ગામોને જોડતા પુલની માંગણી

અરવલ્લી જિલ્લાના મેઘરજ તાલુકામાં પીસાલ અને ઇપલોડા ગામોને જોડતા પુલની માંગણી સાથે ગ્રામજનો દ્વારા કરવામાં આવેલો વિરોધ દર્શાવે છે કે આ એક ગંભીર સમસ્યા છે. ચોમાસામાં નદી પર પુલ ન હોવાથી લોકોને ભારે મુશ્કેલીઓનો સામનો કરવો પડે છે અને તેમના જીવન પર જોખમ રહે છે. આ પરિસ્થિતિ સરકાર અને સ્થાનિક તંત્રની નિષ્ફળતા દર્શાવે છે, જેઓ નાગરિકોને મૂળભૂત સુવિધાઓ પૂરી પાડવામાં નિષ્ફળ રહ્યા છે.