Dwarka Rain: રાવલથી કલ્યાણપુરના સ્ટેટ હાઇવે પર સાની ડેમનું પાણી ફરી વળ્યું, હાલ પુરતો સ્ટેટ હાઇવે બંધ

દ્વારકામાં બે દિવસથી સતત વરસાદ પડી રહ્યો છે. સતત બે દિવસથી પડી રહેલા વરસાદના કારણે નદી નાળા છલકાય ગયા છે. દ્વારકામાં વહેલી સવારથી વરસાદ મન મૂકીને વરસી રહ્યો છે જેના કારણે નીચાણવાળા વિસ્તારોમાં પાણી ભરાયા છે. રાવલથી કલ્યાણપુર તરફનો સ્ટેટ હાઇવે બંધ કરવામાં આવ્યો છે. જામ કલ્યાણપુરમાં આવેલા સાની ડેમનું પાણી રોડ રસ્તા પર ફરી વળ્યું છે. તંત્ર દ્વારા રોડની બન્ને સાઈડ બેરિકેડિંગ કરી સાવચેતીના ભાગરુપે સ્ટેટ હાઈવે બંધ કરાયો.

સ્ટેટ હાઇવે બંધ કરવામાં આવ્યો

જામ કલ્યાણપુર તાલુકામાં મુશળધાર વરસાદને પગલે રાવલથી કલ્યાણપુર તરફનો સ્ટેટ હાઇવે બંધ થયો છે. સુર્યાવદર નજીક કોઝવે ઉપર સાની ડેમનું પાણી ફરી વળતા તંત્ર દ્વારા સ્ટેટ હાઇવે બંધ કરાયો છે. તંત્ર દ્વારા રોડની બંને સાઇડ બેરીટેક રાખી પોલીસ બંદોબસ્ત સાથે લોકોની અવર જવર માટે બંધ કરવામાં આવ્યો છે. મામલતદાર દ્વારા સાવચેતીના ભાગરૂપે હાલ પુરતો સ્ટેટ હાઇવે બંધ કરી દેવામાં આવ્યો છે.

ભારે વરસાદથી રસ્તાઓ પર પાણી ફરી વળ્યા

કલ્યાણપુરના ભાટિયાની આસપાસ વિસ્તારમાં ભારે વરસાદથી રસ્તાઓ પર પાણી ફરી વળ્યા છે. ભાટિયા ગામ બહારના મુખ્ય માર્ગ પર પાણી ભરાતા લોકોને હાલાકીનો સામનો કરવો પડ્યો છે. ભાટિયા આસપાસ વિસ્તારમાં 3 ઇંચથી વધુ વરસાદ ખાબક્યો છે. ભાટિયા ગામથી ભોગાત ગામ તરફ જવાના રસ્તા પર પાણી ફરી વળ્યા છે. દ્વારકામાં બે દિવસથી પડી રહેલા વરસાદના પગલે વહીવટી તંત્ર ખડે પગે છે. જૂન મહિનાથી જ દ્વારકા મામલતદાર કચેરીએ કંટ્રોલ રૂમ કાર્યરત કરવામાં આવ્યું છે. દ્વારકા શહેરમાં નગરપાલિકા તેમજ ફાયર ટિમ ખડેપગે રાખવામાં આવી છે. દ્વારકા ગ્રામ્ય વિસ્તારોમા દરેક ગામના તલાટી મંત્રી અને સરપંચ સાથે સંકલન કરી તંત્ર સતત સંપર્કમાં છે. આગામી દિવસોમાં ભારે વરસાદની આગાહીના પગલે દ્વારકા તરવૈયાની ટીમ પણ તૈનાત કરવામાં આવી છે.