રાજકોટના જસદણ શહેર અને તેના ગ્રામ્ય વિસ્તારોમાં બપોર બાદ અચાનક વાતાવરણમાં પલટો આવ્યો હતો. જેના પગલે ધોધમાર વરસાદ વરસ્યો હતો. ખાસ કરીને જસદણના લાલકા ગામ સહિતના ગ્રામ્ય વિસ્તારોમાં વરસાદનું જોર વધુ જોવા મળ્યું હતું. બપોરના સમયે શરૂ થયેલા આ ભારે વરસાદના કારણે જસદણના ગ્રામ્ય પંથકમાં જળબંબાકારની સ્થિતિ સર્જાઈ હતી.
જસદણના લાલકા ગામમાં ધોધમાર વરસાદ
આ વિસ્તારમાં લગભગ એક ઇંચ જેટલો વરસાદ વરસી ગયો હતો. ભારે વરસાદના કારણે ખેતરોમાં મોટા પ્રમાણમાં પાણી ભરાયા હતા અને ચારે તરફ પાણી પાણી થઈ ગયું હતું. વરસાદની આ સ્થિતિએ ખેડૂતોની ચિંતામાં મોટો વધારો કર્યો છે. ઉલ્લેખનીય છે કે આ પહેલા પણ પડેલા વરસાદને કારણે ખેતરોમાં ભરાયેલા પાણી હજુ સંપૂર્ણપણે ઓસર્યા નહોતા. ત્યાં ફરીથી ધોધમાર વરસાદ વરસતાં ખેડૂતોની મુશ્કેલી બેવડાઈ છે.
