ગુજરાતમાં જુલાઈના અંતિમ સપ્તાહમાં અતિભારે વરસાદને કારણે સમગ્ર રાજ્યમાં જળબંબાકાર જેવી સ્થિતિ સર્જાઈ હતી. વરસાદને કારણે મોટું નુકસાન પણ સામે આવ્યું હતું. પરંતુ થોડા દિવસોથી વરસાદે જાણે વિરામ લીધો હોય તેમ રાજ્યમાં મેઘમહેર થવાની બંધ થઈ ગઈ છે. હવામાન નિષ્ણાંતોના જણાવ્યા પ્રમાણે અલનીનોની સ્થિતિને કારણે હાલમાં વરસાદ બંધ રહ્યો છે. પરંતુ ઓગસ્ટના અંતમાં ફરીવાર વરસાદનો રાઉન્ડ આવશે. બીજી બાજુ હવામાન વિભાગ દ્વારા સતત વરસાદની આગાહી કરવામાં આવી રહી છે. રાજ્યમાં પવન સાથે સાર્વત્રિક વરસાદની આગાહી કરવામાં આવી છે.
મોન્સૂન ટ્રફ અને વેસ્ટર્ન ડિસ્ટર્બન્સની સક્રિયતા
ગુજરાતમાં મોન્સૂન ટ્રફ અને વેસ્ટર્ન ડિસ્ટર્બન્સની સક્રિયતાના કારણે હવામાન વિભાગ દ્વારા રાજ્યમાં પવન સાથે સાર્વત્રિક વરસાદની આગાહી કરવામાં આવી છે. આ દરમિયાન 30થી 50 કિમી પ્રતિ કલાકની ઝડપે પવન ફૂંકાવાની શક્યતા છે. જ્યારે અમદાવાદમાં ગાજવીજ સાથે વરસાદ પડી શકે છે. આગાહી મુજબ સુરત, નવસારી, વલસાડ અને ડાંગમાં વરસાદ થવાની સંભાવના છે. તેમજ મધ્ય અને ઉત્તર ગુજરાતમાં છૂટાછવાયા અને સૌરાષ્ટ્ર-કચ્છમાં મધ્યમ વરસાદી ઝાપટાં પડી શકે છે. જોકે ભારેથી અતિભારે વરસાદની શક્યતા નહિવત દર્શાવવામાં આવી છે. વાતાવરણમાં ભેજનું પ્રમાણ વધવાને કારણે નાગરિકોને ગરમી અને અસહ્ય ઉકળાટનો અનુભવ પણ થશે.