ગુજરાતમાં આ વખતે વરસાદની 10 ટકાથી વધુ ઘટ સેવાઈ છે. અલનીનોની અસરને કારણે આ વખતનું ચોમાસુ નબળું સાબિત થયું છે. ઓછા વરસાદને કારણે ખેતી પર મોટી અસર થવા પામી છે. વરસાદની વિદાય ટાણે જ ભાદરવો ઉનાળાની જેમ આકરો તપી રહ્યો છે. ત્યારે હવામાન વિભાગે રાજ્યમાં ફરી વરસાદની આગાહી કરી છે. વેસ્ટર્ન ડિસ્ટર્બન્સ સક્રિય થતાં વાતાવરણમાં પલટો આવશે. જેના કારણે દક્ષિણ ગુજરાતમાં વરસાદ પડવાની સંભાવના છે.
સુરતમાં બેવડી ઋતુનો માહોલ જામ્યો
રાજ્યમાં દક્ષિણ-પશ્ચિમ અને પશ્ચિમ દિશાના પવનો ફૂંકાઈ રહ્યા છે અને મહત્તમ તાપમાન 37થી 38 ડિગ્રી આસપાસ રહેવાની શક્યતા છે.જેમાં અમદાવાદમાં પણ 37 ડિગ્રી તાપમાન નોંધાયું છે.મેઘરાજાની સત્તાવાર વિદાય બાદ સુરતમાં બેવડી ઋતુનો માહોલ જામ્યો છે.શહેરમાં એક તરફ બપોરના સમયે આકરો તાપ સાથે ઓક્ટોબર હીટ અકળાવી રહી છે,તો બીજી તરફ પવનની બદલાયેલી દિશા શિયાળાના આગમનના સંકેત આપી રહી છે.હવામાન વિભાગના આંકડા મુજબ મંગળવારે શહેરમાં મહત્તમ તાપમાન 35.2 ડિગ્રી સેલ્સિયસ અને લઘુત્તમ તાપમાન 25.8 ડિગ્રી સેલ્સિયસ નોંધાયું હતું.