અમરેલી જિલ્લામાં છેલ્લા કેટલાક સમયથી વ્યાપેલા ગરમી અને બફારા વચ્ચે અચાનક હવામાનમાં પલટો જોવા મળ્યો છે. આકાશમાં કાળાડિબંગ વાદળો ઘેરાયા બાદ વિવિધ વિસ્તારોમાં વરસાદી માહોલ જામ્યો હતો, જેનાથી સ્થાનિક રહીશો અને ખેડૂતોને મોટી રાહત મળી છે.
સાવરકુંડલા બાદ કોસ્ટલ બેલ્ટમાં વરસાદી ઝાપટાં
હવામાનમાં આવેલા બદલાવને પગલે સૌપ્રથમ સાવરકુંડલા પંથકમાં વરસાદનું આગમન થયું હતું. ત્યારબાદ જાફરાબાદ સહિતના દરિયાકાંઠાના વિસ્તારોમાં પણ વરસાદી ઝાપટાં શરૂ થયા હતા. જાફરાબાદ શહેરના અમુક ચોક્કસ ભાગોમાં ઝાપટાં પડતાં માર્ગો પર ભીનાશ પથરાઈ ગઈ હતી.
સાવરકુંડલાના ખડસલી ગામે ધોધમાર વરસાદ
સાવરકુંડલા તાલુકાના ખડસલી ગામે અચાનક ધોધમાર વરસાદી ઝાપટું વરસી પડ્યું હતું. ટૂંકા સમયમાં પડેલા જોરદાર વરસાદને કારણે ખડસલી ગામની શેરીઓ અને શેરી-મોહલ્લાઓમાં પાણી વહેતા થઈ ગયા હતા.
https://twitter.com/sandeshnews/status/2097609750322262406
ખેડૂતોમાં ખુશીનો માહોલ અને નવી આશા
લાંબા સમયથી વરસાદની વાટ જોઈ રહેલા ખેડૂતો માટે આ વરસાદી ઝાપટું સંજીવની સમાન સાબિત થયું છે. અચાનક પડેલા વરસાદથી ખડસલી સહિતના ગ્રામ્ય વિસ્તારોના ખેડૂતોમાં ભારે હાશકારો અનુભવાયો છે. આ વરસાદી ઝાપટાંને કારણે આગામી દિવસોમાં વધુ સારા વરસાદની આશાઓ બંધાઈ છે, જેનાથી સુકાઈ રહેલા પાકને નવજીવન મળવાની શક્યતા છે.
આ પણ વાંચો: Amreliના કોલડા ગામે ખેતમજૂર યુવકની આત્મહત્યા, 4 લોકો સામે નામજોગ ગુનો દાખલ
