ગુજરાતમાં ભારે વરસાદની આગાહીને પગલે રાજ્યના અનેક જિલ્લાઓમાં વહીવટી તંત્ર એલર્ટ મોડમાં આવ્યું છે. તકેદારીના ભાગરૂપે આવતીકાલે 24 જુલાઈએ અમદાવાદ, ગાંધીનગર, સુરત, દાહોદ અને નર્મદા જિલ્લાની તમામ સરકારી, અનુદાનિત તેમજ ખાનગી શાળા-કોલેજોમાં રજા જાહેર કરવામાં આવી છે. વિદ્યાર્થીઓ અને વાલીઓની સુરક્ષાને ધ્યાનમાં રાખીને આ નિર્ણય લેવામાં આવ્યો હોવાનું તંત્રએ જણાવ્યું છે.
192 રસ્તાઓ વાહનવ્યવહાર માટે બંધ કરવામાં આવ્યા
સુરત જિલ્લામાં છેલ્લા ત્રણ દિવસથી સતત ધોધમાર વરસાદ વરસી રહ્યો છે. જિલ્લામાં સૌથી વધુ વરસાદ ઉમરપાડા તાલુકામાં નોંધાયો છે, જ્યાં કુલ 20.67 ઈંચ વરસાદ ખાબક્યો છે. જ્યારે છેલ્લા 24 કલાકમાં જ 6.87 ઈંચ વરસાદ નોંધાતા નીચાણવાળા વિસ્તારોમાં પાણી ભરાવાની સ્થિતિ સર્જાઈ છે. ભારે વરસાદના કારણે કેવડી અને લાકી ડેમ સંપૂર્ણ ભરાઈ ગયા છે. અનેક નદીઓ અને નાળાઓમાં પાણીની આવક વધતાં પૂર જેવી સ્થિતિ ઉભી થઈ છે. જિલ્લામાં પાણી ભરાવા અને માર્ગો ધોવાઈ જવાના કારણે કુલ 192 રસ્તાઓ વાહનવ્યવહાર માટે બંધ કરવામાં આવ્યા છે. તંત્ર દ્વારા સતત પરિસ્થિતિ પર નજર રાખવામાં આવી રહી છે.