સુરત શહેરમાં વરસી રહેલા ભારે વરસાદના કારણે વધુ એક મહત્વપૂર્ણ અંડરપાસ પાણીમાં ગરકાવ થઈ ગયો છે. ઉધના ભીમનગર-ડિંડોલી અંડરપાસમાં મોટા પ્રમાણમાં પાણી ભરાઈ જતાં વાહનવ્યવહાર માટે તેને બંધ કરવાની ફરજ પડી છે. મહાનગરપાલિકાના તંત્ર દ્વારા બેરિકેટ્સ લગાવીને રસ્તો બંધ કરી દેવાતાં સ્થાનિકો અને વાહનચાલકોમાં ભારે રોષ જોવા મળી રહ્યો છે. વર્ષો જૂની આ સમસ્યા હોવા છતાં મનપા દ્વારા યોગ્ય ડ્રેનેજ સિસ્ટમ કે લાઇન ન બદલાતાં દર ચોમાસે નાગરિકોને ભારે હાલાકી ભોગવવી પડી રહી છે.

ઉદ્યોગનગરના ઝૂંપડપટ્ટી વિસ્તારના ઘરોમાં વહ્યા પાણી

અંડરપાસ ઉપરાંત ઉધના રોડ નંબર 6 પર આવેલ ઉદ્યોગનગર વિસ્તારમાં પણ જળબંબાકારની ગંભીર સ્થિતિ સર્જાઈ છે. વરસાદી પાણીના યોગ્ય નિકાલની વ્યવસ્થા ન હોવાને કારણે આસપાસના ઝૂંપડપટ્ટી વિસ્તારમાં રહેતા ગરીબ પરિવારો સૌથી વધુ પ્રભાવિત થયા છે. નીચાણવાળા ઘરોમાં વરસાદી પાણી ફરી વળતાં લોકો પોતાના જ ઘરોમાંથી ડોલ અને વાસણો વડે પાણી બહાર કાઢવા માટે મજબૂર બન્યા છે, જેના કારણે સામાન્ય જનજીવન અસ્તવ્યસ્ત થઈ ગયું છે.

25 દિવસમાં ત્રીજી વખત ઘરોમાં પાણી ઘૂસતાં સ્થાનિકોનો આક્રોશ

સ્થાનિક રહીશોના જણાવ્યા અનુસાર, છેલ્લા માત્ર 25 દિવસની અંદર આ ત્રીજી વખત બન્યું છે જ્યારે વરસાદી પાણી તેમના ઘરોમાં ઘૂસી ગયા હોય. સતત સર્જાતી આ મુશ્કેલીને કારણે લોકોનો આક્રોશ ચરમસીમાએ પહોંચ્યો છે. સ્થાનિકોએ પાલિકા તંત્ર અને વહીવટી અધિકારીઓ સામે ઘોર બેદરકારીના આક્ષેપો કરતાં માંગ કરી છે કે આ સમસ્યાનો કાયમી ઉકેલ લાવવા માટે તાત્કાલિક ધોરણે નક્કર કામગીરી કરવામાં આવે.

આ પણ વાંચો : Corona Case : વડોદરામાં 4 વર્ષ બાદ કોરોનાની એન્ટ્રી, SSG હોસ્પિટલમાં સંક્રમિત દર્દી દાખલ, તંત્ર હરકતમાં