વડોદરા શહેર અને જિલ્લામાં હવામાન વિભાગ દ્વારા ભારેથી અતિભારે વરસાદની વર્તાયેલી ગંભીર આગાહીને પગલે વહીવટી તંત્ર તાત્કાલિક હરકતમાં આવ્યું છે. વિદ્યાર્થીઓની સુરક્ષાને પ્રાથમિકતા આપતાં જિલ્લા કલેક્ટર દ્વારા આવતીકાલે તમામ સરકારી તેમજ ખાનગી શાળા-કોલેજો અને શૈક્ષણિક સંસ્થાઓ બંધ રાખવાનો સત્તાવાર આદેશ જારી કરવામાં આવ્યો છે. આ નિર્ણયથી વાલીઓ અને વિદ્યાર્થીઓએ રાહત અનુભવી છે.
કલેક્ટરે લોકોને સાવચેત રહેવા કરી અપીલ
વરસાદી માહોલ અને પૂરની શક્યતાઓને ધ્યાનમાં રાખીને જિલ્લા કલેક્ટરે તમામ નાગરિકોને બિનજરૂરી બહાર ન નીકળવા અને સાવચેતી રાખવા માટે ખાસ અપીલ કરી છે. ખાસ કરીને નીચાણવાળા વિસ્તારોમાં રહેતા લોકોને સાવધ રહેવા જણાવવામાં આવ્યું છે. તંત્ર દ્વારા કંટ્રોલ રૂમ કાર્યરત કરી દેવામાં આવ્યા છે અને કોઈ પણ આકસ્મિક પરિસ્થિતિને પહોંચી વળવા માટે અધિકારીઓને હેડક્વાર્ટર ન છોડવા તાકીદ કરવામાં આવી છે.
બચાવ-રાહત કામગીરી માટે તંત્રની તૈયારીઓ તેજ
ભારે વરસાદને કારણે સર્જાનારી કોઈપણ વિકટ સ્થિતિ સામે લડવા માટે વડોદરા જિલ્લા વહીવટી તંત્ર દ્વારા પૂર્વતૈયારીઓ તેજ કરી દેવામાં આવી છે. એનડીઆરએફ અને સ્થાનિક ડિઝાસ્ટર મેનેજમેન્ટની ટીમોને એલર્ટ મોડ પર રાખવામાં આવી છે. પાણી ભરાવાની સંભાવના ધરાવતા વિસ્તારો અને નદી-નાળા કાંઠે સતત મોનિટરિંગ વધારી દેવામાં આવ્યું છે, જેથી કોઈપણ કટોકટીના સમયે ઝડપી રાહત અને બચાવ કામગીરી હાથ ધરી શકાય.
જાણો ક્યાં ક્યાં શાળા કોલેજો બંધ રહેશે
સુરત, વડોદરા, નવસારી અને અમદાવાદમાં ભારેથી અતિભારે વરસાદની આગાહીને પગલે સ્થાનિક તંત્ર દ્વારા આવતીકાલે તમામ શાળા-કોલેજોમાં રજા જાહેર કરવામાં આવી છે. નીચાણવાળા વિસ્તારોમાં જળબંબાકાર અને બાળકોની સુરક્ષાને ધ્યાનમાં રાખીને જિલ્લા કલેક્ટરો દ્વારા શૈક્ષણિક સંસ્થાઓ બંધ રાખવાનો આદેશ આપવામાં આવ્યો છે, સાથે જ પ્રશાસને લોકોને કામ વગર બહાર ન નીકળવા અને સાવચેત રહેવા અપીલ કરી છે.
આ પણ વાંચો : Modasa ના મડાસણા પાસે કાર અકસ્માતમાં યુવકના મોત બાદ ગ્રામજનોનો ઉગ્ર વિરોધ, રાજેન્દ્ર નગર રોડ પર ચક્કાજામ
