Morbi : માર્કેટિંગ યાર્ડના કચરાની દુર્ગંધથી લોકો પરેશાન, સ્થાનિક મહિલાઓએ ગેટ પર ચક્કાજામ કરીને કર્યો વિરોધ

મોરબી શહેરમાં ચક્કાજામ કરી સુતેલા તંત્રને જગાડવાની પેટર્ન બની ગઈ હોય તેમ આજે મોરબી માર્કેટિંગ યાર્ડનો કચરો સમગ્ર વિસ્તારમાં દુર્ગંધ ફેલાવી રહ્યો હોય સ્થાનિક મહિલાઓએ આ પ્રશ્નને લઈ માર્કેટિંગ યાર્ડના ગેટ ઉપર ચક્કાજામ કર્યો હતો.

અનેક વખત રજુઆત કરવામાં આવી હોવા છતાં કોઈ અસર નહીં

મોરબી શહેરમાં વિવિધ જગ્યાએ સમસ્યાઓને લઈને લોકો રસ્તા પર ઉતરી વિરોધ કરી રહ્યા છે, ત્યારે માર્કેટિંગ યાર્ડમાં કચરો મોટા પ્રમાણમાં છે. જેને લઈને ગંદકી ફેલાઈ રહી છે. આ ગંદકીની દુર્ગંધ સમગ્ર વિસ્તારમાં આવી રહી છે. જેને લઈને આ વિસ્તારમાં રહેતા લોકોને હાલાકી પડી રહી છે. આ મામલે અનેક વખત રજુઆત કરવામાં આવી હોવા છતાં કોઈ પગલાં લેવામાં આવતા નથી.

સ્થાનિક મહિલાઓએ માર્કેટીંગ યાર્ડનો ગેટ બ્લોક કરી દીધો

મોરબી શહેરમાં મનપાના સત્તાધીશોને ઢંઢોળવા માટે સ્થાનિક મહિલાઓએ માર્કેટીંગ યાર્ડનો ગેટ બ્લોક કરી દીધો હતો અને કોઈને અંદર કે બહાર જવા દેવામાં આવતા ન હતા. જો કે થોડીવાર બાદ સ્થાનિક મહિલાઓએ જાતે જ આ ચક્કાજામ હટાવી દીધો હતો અને કહ્યું હતું કે હજુ જો કચરો ઉઠાવવાની કામગીરી કરવામાં નહીં આવે તો લાંબા સમય સુધી ચક્કાજામ ચાલશે.