આગામી 11 તારીખથી શરૂ થઈ રહેલા ભવ્ય નવરાત્રિ પર્વને ધ્યાનમાં રાખીને અમદાવાદ શહેર પોલીસ દ્વારા સુરક્ષા અને વ્યવસ્થાપન માટે એક વ્યાપક આયોજન કરવામાં આવ્યું છે. શહેરમાં 84 ગરબા આયોજકો માટે મંજૂરી પ્રક્રિયા ચાલી રહી છે, જ્યારે આશરે 1,300 જગ્યાઓ પર પરંપરાગત શેરી ગરબાનું આયોજન થવાનું છે. ખેલૈયાઓ સુરક્ષિત વાતાવરણમાં ગરબા માણી શકે તે માટે તંત્ર દ્વારા કડક બંદોબસ્ત ગોઠવવામાં આવ્યો છે.
14,000 સુરક્ષા કર્મીઓ અને AI કેમેરાથી સજ્જ મોનિટરિંગ
અમદાવાદ શહેરમાં કાયદો અને વ્યવસ્થા જાળવવા માટે 500 જેટલા ઉચ્ચ અધિકારીઓ (જેમાં સેક્ટર JCP, DCP, ACP, PI અને PSIનો સમાવેશ થાય છે) મોનિટરિંગ કરશે. કુલ મળીને 14,000 પોલીસ કર્મચારીઓ અને હોમગાર્ડ જવાનો તૈનાત રહેશે. ગરબા ગ્રાઉન્ડ પર ભીડ નિયંત્રિત કરવા અને સુરક્ષા વધારવા માટે AI બેઝ્ડ કેમેરા, ડ્રોન તેમજ કાઉન્ટિંગ મશીન ફરજિયાત કરવામાં આવ્યા છે. સમગ્ર શહેરમાં આશરે 4,000 જેટલા કેમેરા દ્વારા વિવિધ લોકેશન પર બાજ નજર રાખવામાં આવશે.
