શહેરમાં સ્થાનિક સ્વરાજ્યની ચૂંટણીના મતદાનના પ્રારંભે જ ખોખરા વિસ્તારમાં વહીવટી તંત્રની ગંભીર બેદરકારી અથવા સંકલનનો અભાવ સામે આવ્યો છે. ખોખરા સબ ઝોનલ ઓફિસ ખાતે આવેલા મતદાન મથકો રાતોરાત અન્ય જગ્યાએ ખસેડી દેવામાં આવતા વહેલી સવારથી મતદાન કરવા પહોંચેલા નાગરિકોમાં ભારે રોષ અને અસમંજસ જોવા મળી રહ્યો છે.
જાણ કર્યા વગર બૂથ ખસેડાયા
મળતી માહિતી મુજબ, ખોખરા સબ ઝોનલ ઓફિસમાં બૂથ નંબર 39 અને 40 ફાળવવામાં આવ્યા હતા. જોકે, મતદાનના દિવસે સવારે જ્યારે મતદારો અને ઉમેદવારો ત્યાં પહોંચ્યા ત્યારે ઓફિસને તાળા લાગેલા જોવા મળ્યા હતા. તપાસ કરતા જાણવા મળ્યું કે આ બૂથને રાતોરાત અન્ય કોઈ સ્થળે ખસેડી દેવામાં આવ્યા છે. ઉમેદવારોએ આક્ષેપ કર્યો છે કે આટલા મોટા ફેરફાર અંગે તેમને પૂર્વ જાણકારી આપવામાં આવી નથી.
