જીતેન્દ્રભાઈ સવજીભાઈ વાઘાણીનો જન્મ 11 સપ્ટેમ્બર, 1970 ના રોજ ભાવનગર જિલ્લાના વરતેજ ગામે થયો હતો. તેમનો ધર્મ હિન્દુ અને જ્ઞાતિ પટેલ છે. તેમનું પ્રાથમિક શિક્ષણ લાઠી (જિ. અમરેલી)ની સરકારી શાળામાં થયું, જ્યારે માધ્યમિક શિક્ષણ કલાપી વિનય મંદિરમાં અને ઉચ્ચતર માધ્યમિક શિક્ષણ ભાવનગરની સનાતન ધર્મ સરકારી હાઈસ્કૂલમાં મેળવ્યું. તેમણે ભાવનગરની એમ.જે. કોલેજ ઓફ કોમર્સમાંથી બી.કોમ. અને શેઠ એચ.જે. લૉ કોલેજમાંથી એલ.એલ.બી.ની પદવી મેળવી છે. હાલ તેઓ પ્લોટ નં. 98-99, "ભગવતી", ઈસ્કોન મેગીસીટી, ભાવનગરમાં રહે છે. તેમના પરિવારમાં પત્ની શ્રીમતી સંગીતા વાઘાણી (ગૃહિણી), પુત્ર મીત વાઘાણી અને પુત્રી ભક્તિ વાઘાણી છે.
રાજકીય કારકિર્દી અને સંગઠનમાં યોગદાન
જીતુભાઈ વાઘાણીની રાજકીય કારકિર્દી ભાજપના યુવા મોર્ચાથી શરૂ થઈ, જ્યાં તેમણે 1990-91 માં ભાવનગર શહેર સહમંત્રી અને 1993-97 માં પ્રમુખ તરીકે સેવા આપી. ત્યારબાદ તેઓ ગુજરાત પ્રદેશ ભાજપ યુવા મોર્ચાના પ્રમુખ (2003-2009) બન્યા અને પ્રદેશ મંત્રી (2009-12) તરીકે સંગઠનમાં મહત્ત્વની ભૂમિકા ભજવી. તેમણે ગુજરાત હાઉસીંગ બોર્ડમાં ડાયરેક્ટર તરીકે પણ કામ કર્યું છે. 2007 માં ભાવનગર દક્ષિણ બેઠક પરથી પ્રથમ વિધાનસભા ચૂંટણી લડ્યા બાદ, 2012 થી તેઓ ભાવનગર (પશ્ચિમ)ના ધારાસભ્ય છે. 2012 માં તેમણે સમગ્ર સૌરાષ્ટ્રમાં સૌથી વધારે, 53,892 મતોની રેકોર્ડ લીડથી વિજય મેળવ્યો હતો.
