ગુજરાતમાં સ્થાનિક સ્વરાજ્યની સંસ્થાઓની પેટાચૂંટણી અને વિવિધ બેઠકોના પરિણામો જાહેર થતા જ ક્યાંક ખુશી તો ક્યાંક મિશ્ર પ્રતિસાદ જોવા મળ્યો છે. અમદાવાદ નજીક આવેલી બારેજા નગરપાલિકામાં મતદારોએ પરિવર્તન અને પક્ષની સામે વ્યક્તિગત ઉમેદવારો પર પણ પસંદગી ઉતારી છે, જ્યારે સુરત અને કચ્છમાં ભાજપે પોતાની પકડ મજબૂત રાખી છે.
બારેજા નગરપાલિકા: મિશ્ર જનાદેશ અને પેનલોમાં ભંગાણ
બારેજા નગરપાલિકાના પરિણામો આ વખતે ઘણા ચોંકાવનારા રહ્યા છે. અહીં વોર્ડ નંબર 1 અને 2 માં કોઈ પણ પક્ષની આખી પેનલ જીતી શકી નથી. બંને વોર્ડમાં ભાજપના ૨ અને અપક્ષના ૨ ઉમેદવારો વિજેતા બન્યા છે, જેનાથી સ્પષ્ટ થાય છે કે અહીં રસાકસી ઘણી તીવ્ર હતી. વોર્ડ નંબર ૩ માં ભાજપે પોતાનું વર્ચસ્વ જાળવી રાખીને આખી પેનલ વિજેતા બનાવી છે. જોકે, વોર્ડ નંબર ૪ માં ભાજપને મોટો ઝટકો લાગ્યો છે, જ્યાં અપક્ષ ઉમેદવારોની આખી પેનલ વિજયી બની છે.
સુરત: ભાજપના વિજયી રથનો પ્રારંભ
રાજ્યના આર્થિક પાટનગર સુરતમાં પણ સ્થાનિક સ્વરાજ્યની ચૂંટણીમાં ભાજપે ધમાકેદાર શરૂઆત કરી છે. શરૂઆતના ટ્રેન્ડમાં જ વોર્ડ નંબર ૪, ૧૯ અને ૨૪ માં ભાજપના ઉમેદવારોની જીત થઈ છે. આ જીત અંગે ધારાસભ્ય મનુભાઈ પટેલે જણાવ્યું હતું કે, આ જીત મતદાતાઓના વિશ્વાસની છે અને જીતનો આ સિલસિલો યથાવત રહેશે.
કચ્છ: નખત્રાણા અને ભુજની સ્થિતિ
કચ્છ જિલ્લામાં નખત્રાણા નગરપાલિકાની કુલ ૨૮ બેઠકો પૈકી ૦૪ બેઠકોના પરિણામોમાં ભાજપે ક્લીન સ્વીપ કરીને ચારેય બેઠકો અંકે કરી છે, જ્યારે કોંગ્રેસ કે અન્યનું ખાતું ખુલ્યું નથી. બીજી તરફ ભુજ તાલુકા પંચાયતની ૩૨ બેઠકોના પરિણામમાં ભાજપ અને કોંગ્રેસ વચ્ચે ટક્કર જોવા મળી હતી, જેમાં બંને પક્ષોને ૨-૨ બેઠકો પ્રાપ્ત થઈ છે.
તાપી: બાલપુર બેઠક પર કેસરીયો
દક્ષિણ ગુજરાતના તાપી જિલ્લામાં વ્યારા તાલુકા પંચાયતની બાલપુર બેઠક પર ભાજપના ઉમેદવાર રેખાબેન ચૌધરીએ શાનદાર વિજય મેળવીને પક્ષની સ્થિતિ મજબૂત કરી છે.
આ પણ વાંચોઃ Gujarat Local Body Election Results 2026 Live: જાણો પંચમહાલ, તિલકવાડા, ઈડર પરિણામોનું સરવૈયું
