મહેસાણા જિલ્લામાં આગામી સ્થાનિક સ્વરાજની ચૂંટણીને લઈને રાજકીય ગરમાવો ચરમસીમાએ પહોંચ્યો છે. ઉમેદવારી ફોર્મ ખેંચવાની પ્રક્રિયા પૂર્ણ થતાની સાથે જ જિલ્લાની ચૂંટણીનું ચિત્ર સ્પષ્ટ થઈ ગયું છે. આ વખતે મહેસાણામાં મતદાન પહેલા જ ભારતીય જનતા પાર્ટીએ મજબૂત પકડ જમાવી છે, કારણ કે અનેક બેઠકો પર હરીફ ઉમેદવારો ન હોવાથી ભાજપ બિનહરીફ વિજેતા બન્યું છે.
બિનહરીફ બેઠકોનું ગણિત
મહેસાણા મહાનગરપાલિકા (મનપા)ની કુલ બેઠકો પૈકી 5 બેઠકો પર ભાજપના ઉમેદવારો બિનહરીફ જાહેર થયા છે. જ્યારે બાકીની 47 બેઠકો માટે હવે 122 ઉમેદવારો વચ્ચે ખરાખરીનો જંગ જામશે.નગરપાલિકા સ્તરે પણ ભાજપનું વર્ચસ્વ જોવા મળ્યું છે.જિલ્લાની 5 નગરપાલિકાઓની કુલ 62 બેઠકો બિનહરીફ થઈ છે. જેમાં સૌથી વધુ કડી નગરપાલિકામાં 28 અને ઊંઝામાં 22 બેઠકો બિનહરીફ જાહેર થઈ છે. આ ઉપરાંત વિસનગરમાં 7 અને વિજાપુરમાં 5 બેઠકો પર ચૂંટણી પૂર્વે જ પરિણામ નક્કી થઈ ગયું છે.