પોરબંદર શહેરમાંથી રેલવે વિભાગને લગતી એક મોટી અને સંવેદનશીલ ઘટના સામે આવી છે. શહેરની PGVCL કચેરી નજીક આવેલા રેલવે ટ્રેક પર પોરબંદર-શાલીમાર ટ્રેનના કોચ શન્ટિંગ કરતી વેળાએ અચાનક પાટા પરથી નીચે ઉતરી ગયા હતા. આ ઘટના બનતા જ રેલવે કર્મચારીઓમાં અને સ્થાનિક સ્ટાફમાં ભારે દોડધામ મચી ગઈ હતી. સદનસીબે આ ઘટનામાં કોઈ મોટી જાનહાની ટળી હતી, પરંતુ ટ્રેન પાટા પરથી ઉતરી જવાથી રેલવે તંત્ર તાત્કાલિક હરકતમાં આવી ગયું હતું.
શન્ટિંગ વખતે સર્જાયેલી ઘટનાનું ચોક્કસ કારણ હજુ અકબંધ
પ્રાપ્ત વિગતો અનુસાર, આ બનાવ પોરબંદર-શાલીમાર ટ્રેનની શન્ટિંગ કામગીરી દરમિયાન બન્યો હતો. જો કે, ટ્રેન કયા કારણોસર પાટા પરથી નીચે ઉતરી તેનું ચોક્કસ કારણ હજુ સુધી અકબંધ છે અને સત્તાવાર રીતે કોઈ સ્પષ્ટ કારણ બહાર આવ્યું નથી. ઘટનાની ગંભીરતાને ધ્યાનમાં રાખીને રેલવે વિભાગના ઉચ્ચ અધિકારીઓ અને ટેકનિકલ કર્મચારીઓ તાત્કાલિક સ્થળ પર દોડી આવ્યા હતા અને આ મામલે સઘન તપાસ શરૂ કરી દેવામાં આવી છે.