કેન્દ્રીય મંત્રી ડૉ. મનસુખ માંડવિયા આગામી 26 અને 27 સપ્ટેમ્બરના રોજ પોરબંદર લોકસભા વિસ્તારના સઘન બે દિવસીય પ્રવાસે આવી રહ્યા છે. આ પ્રવાસના પ્રથમ દિવસે તેઓ ગોંડલ ખાતે આવેલા મહારાજાશ્રી ભગવતસિંહજી આર્ટ્સ એન્ડ કોમર્સ કોલેજ ખાતે વિશેષરૂપે યોજાનાર 'યુવા સંવાદ' કાર્યક્રમમાં ઉપસ્થિત રહેશે અને યુવાનો સાથે સંવાદ કરશે. ત્યારબાદ બપોરે 2:00 વાગ્યે તેઓ "ગોરસ" કાર્યાલયની મુલાકાત લઈને સ્થાનિક આગેવાનો અને કાર્યકર્તાઓ સાથે ચર્ચા-વિચારણા કરશે.
ખોડલધામ ધ્વજારોહણ અને આયુર્વેદ સંસ્થાનનું ભવ્ય ઉદ્ઘાટન
પ્રવાસના બીજા દિવસે એટલે કે 27 સપ્ટેમ્બરે સવારે 8:30 વાગ્યે ડૉ. મનસુખ માંડવિયા કાગવડ સ્થિત પ્રસિદ્ધ યાત્રાધામ ખોડલધામ ખાતે પહોંચીને ભક્તિભાવપૂર્વક ધ્વજારોહણમાં સહભાગી થશે. ત્યારબાદ તેઓ અનિડા (ભાલોડી) ગામે આયુર્વેદ અને પંચકર્મ સંસ્થાનનું ભવ્ય ઉદ્ઘાટન કરશે. આ ઉપરાંત, બપોરના સત્રમાં ડૈયા, ત્રાકુડા અને આંબરડી ગામોમાં જઈને પ્રજાકીય ઉપયોગી વિવિધ વિકાસકામોના ખાતમુહૂર્ત અને લોકાર્પણ કાર્યક્રમોમાં ઉત્સાહભેર ભાગ લેશે.