રાજકોટ શહેરમાં એન્ટી કરપ્શન બ્યુરો દ્વારા ભ્રષ્ટાચાર વિરુદ્ધ વધુ કાર્યવાહી કરવામાં આવી છે. શહેરના આજી ડેમ પોલીસ સ્ટેશન હસ્તકની આજી ડેમ પોલીસ ચોકી ખાતે ફરજ બજાવતા એક ASI અને GRD કર્મચારીને જામીન અપાવવા અને લોકઅપમાં નહીં રાખવાના બદલામાં રૂ.10 હજારની લાંચ સ્વીકારતા ACBની ટીમે રંગે હાથ ઝડપી પાડ્યા છે.આ સફળ ટ્રેપથી પોલીસ બેડામાં ભારે ચકચાર મચી જવા પામી છે.
ફરિયાદી પાસે 10 હજારની લાંચ માંગી
ફરીયાદી વિરુદ્ધ આજી ડેમ પોલીસ સ્ટેશનમાં અગાઉ એક ફોજદારી ફરિયાદ દાખલ કરવામાં આવી હતી.આ ગુનાની તપાસ આ કેસના આરોપી પોલીસ કર્મચારી રાજેશ મેર કરી રહ્યા હતા.ફરિયાદીને પોલીસ સ્ટેશનના લોકઅપમાં ન પૂરવા માટે અને વહેલી તકે જામીન મેળવવાની કાનૂની પ્રક્રિયા સરળ કરી આપવાના બદલામાં આરોપી પોલીસકર્મી દ્વારા 10 હજારની લાંચની માંગણી કરવામાં આવી હતી.આ લાંચની રકમ આરોપી મનોજ ચૌહાણને આપી દેવા માટે પણ જણાવવામાં આવ્યું હતું. ફરિયાદી લાંચ આપવાના કોઈ પણ પ્રકારના પક્ષમાં ન હોવાથી તેઓએ તાત્કાલિક ACBનો સંપર્ક સાધીને સમગ્ર મામલે ફરિયાદ નોંધાવી હતી.