ગુજરાતમાં દારૂબંધીનો કાયદો અમલી છે. પરંતુ તેની કાળી બાજુ એ છે કે, રોજ રાજ્યમાં કરોડોની કિંમતનો દારુ ઠલવાય છે અને ગેરકાયદેસર રીતે તેનું વેચાણ પણ ચાલુ છે તે પોલીસ દ્વારા પકડવામાં આવતા દારૂના જથ્થાની ઘટનાઓ પરથી જોવા મળે છે. રાજ્યમાં સરકાર દ્વારા વાઈન એન્ડ ડાઈન પોલીસી અંતર્ગત ગાંધીનગર ખાતે ગિફ્ટ સિટીમાં દારુ પીવાની છૂટ આપવામાં આવી છે. ત્યારે ઘણા સમયથી સોશિયલ મીડિયામાં ગુજરાતમાંથી દારૂબંધી હટાવી લેવા માટે એક ઝૂંબેશ ચાલી રહી છે. જે અંતર્ગત આ ઝુંબેશ ચલાવનાર અતુલભાઈ દ્વારા રાજકોટમાં એક પ્રેસ કોન્ફરન્સ કરવામાં આવી હતી.  

ગાંધીજીના નામે માત્ર દંભ અને લોકોને અન્યાય

સોશિયલ મીડિયામાં ગુજરાતમાંથી દારૂબંધી હટાવી લેવા અંગેની ઝૂંબેશ ચલાવતા અમદાવાદના અતુલભાઈએ રાજકોટમાં પ્રેસ કોન્ફરન્સ કરી હતી. જેમાં તેમણે રાજ્યમાંથી તુરંત દારૂબંધી હટાવવામાં આવે તેવી પ્રબળ માંગણી સાથે ઉગ્ર આંદોલન કરવાની ચીમકી પણ ઉચ્ચારી હતી.અતુલભાઈએ જણાવ્યું હતું કે,જો રાજ્યમાં દારૂબંધી હટાવવામાં આવે તો સરકારને હજારો કરોડ રૂપિયાની રેવન્યુ પ્રાપ્ત થશે.રાજ્યમાં ચાલતો ભ્રષ્ટાચાર દૂર થશે અને નકલી દારૂના દૂષણથી ગુજરાતની જનતાને મોટી મુક્તિ મળી શકશે.તેમણે આક્ષેપ કર્યો હતો કે દારૂબંધીના કાયદાને લઈને ગાંધીજીના નામે માત્ર દંભ અને લોકોને અન્યાય કરવામાં આવી રહ્યો છે.

પત્રકાર પરિષદમાં સત્તાવાર જાહેરાત

તેમણે પ્રેસ કોન્ફરન્સમાં એવો તર્ક રજૂ કર્યો હતો કે જ્યારે ગાંધીજીની હત્યા થઈ ત્યારે ગુજરાત રાજ્યનું અસ્તિત્વ જ ન હતું.ગાંધી આશ્રમની મુલાકાતે આવતા લોકો પર કટાક્ષ કરતા તેમણે પ્રશ્ન કર્યો હતો કે ત્યાં આવનારા લોકો શું દારૂ નથી પીતા? તેમણે જણાવ્યું હતું કે, ગિફ્ટ સિટીમાં દારૂ પીવાય પણ છે અને વેચાય પણ છે.ત્યાં દારૂની છૂટછાટ આપવામાં આવી છે. જ્યારે આખા ગુજરાતમાં તેના પર પ્રતિબંધ છે.જે સીધી રીતે જ ગુજરાતની જનતા સાથે મોટો અન્યાય છે.દારૂની જ્યાં છૂટ હોય ત્યાં પણ જેને દારૂ નથી પીવો તે નથી જ પીવાના અને જેને પીવો હોય તેને ગમે ત્યાંથી મળી જ રહે છે.આ મુદ્દે સરકાર વિરુદ્ધ અવાજ બુલંદ કરવા માટે આગામી બીજી ઓક્ટોબરના રોજ ગાંધીનગરમાં એક વિશાળ આંદોલન કરવામાં આવશે તેવી પણ આ પત્રકાર પરિષદમાં સત્તાવાર જાહેરાત કરવામાં આવી છે.

આ પણ વાંચોઃ Sandesh Digital Explainer: હિમાલયના પહાડોમાં સૌથી મોટું રહસ્ય, માં નંદા દેવીની યાત્રામાં ક્યાં ગાયબ થઈ જાય છે 4 શિંગડાવાળું ઘેટું?