રાજકોટ સહિત સમગ્ર સૌરાષ્ટ્રવાસીઓ જેની આતુરતાપૂર્વક રાહ જોતા હોય છે, તેવા પરંપરાગત જન્માષ્ટમી લોકમેળાની વહીવટી તંત્ર દ્વારા તડામાર તૈયારીઓ શરૂ કરી દેવામાં આવી છે. સૌરાષ્ટ્રના આ સૌથી મોટા લોકમેળાને આકર્ષક, ભવ્ય અને સુરક્ષિત બનાવવા માટે વહીવટી તંત્ર દ્વારા અત્યારથી જ એક્શન પ્લાન ઘડી કાઢવામાં આવ્યો છે, જેને પગલે મેળાના રસિયાઓમાં ભારે ઉત્સાહ જોવા મળી રહ્યો છે.
મેળા માટે આકર્ષક લેઆઉટ અને ડિઝાઇન તૈયાર
આ વર્ષના લોકમેળાને વધુ વ્યવસ્થિત બનાવવા માટે વહીવટી તંત્ર દ્વારા મેળાની ખાસ ડિઝાઇન અને લેઆઉટ તૈયાર કરી લેવામાં આવ્યા છે. કયા વિભાગમાં કઈ રાઇડ્સ રાખવામાં આવશે, ખાણી-પીણીના સ્ટોલ ક્યાં ગોઠવવામાં આવશે, અને કાયદો-વ્યવસ્થા તેમજ ટ્રાફિકનું નિયમન કેવી રીતે થશે, તે તમામ બાબતોને ઝીણવટપૂર્વક ધ્યાનમાં રાખીને નકશો આખરી કરવામાં આવ્યો છે. મુલાકાતીઓની સુવિધા જળવાય તે રીતે આખી ડિઝાઇન બનાવાઇ છે.
20 જુલાઈની આસપાસ સ્ટોલ અને પ્લોટના ફોર્મનું વિતરણ
મેળો યોજવા માટેની વહીવટી પ્રક્રિયાના ભાગરૂપે મેળાના મેદાનમાં સ્ટોલ, પ્લોટ કે ચકડોળ મેળવવા ઈચ્છતા વેપારીઓ માટે મહત્વના સમાચાર આવ્યા છે. આગામી 20 જુલાઈની આસપાસથી સ્ટોલ અને પ્લોટ ફાળવણી માટેના ફોર્મનું વિતરણ શરૂ કરી દેવામાં આવશે. વહીવટી તંત્ર દ્વારા નિયત પદ્ધતિથી પારદર્શક રીતે તમામ પ્લોટની ફાળવણી કરવામાં આવશે.
આગામી 2 થી 6 સપ્ટેમ્બર વચ્ચે યોજાશે લોકમેળો
આ વર્ષે જન્માષ્ટમીના તહેવારો નિમિત્તે યોજાનારો આ ભવ્ય લોકમેળો આગામી 2 સપ્ટેમ્બરથી શરૂ થશે અને 6 સપ્ટેમ્બર સુધી ચાલશે. પાંચ દિવસ સુધી ચાલનારા આ લોકજીવનના મહોત્સવમાં રાજકોટ શહેર ઉપરાંત આસપાસના ગ્રામ્ય વિસ્તારો અને અન્ય જિલ્લાઓમાંથી પણ લાખોની સંખ્યામાં માનવમેદની ઉમટી પડે તેવી શક્યતા સેવાઈ રહી છે.
રાજકોટના ઐતિહાસિક રેસકોર્સ મેદાન ખાતે જામશે મેળો
દર વર્ષની પરંપરા મુજબ આ વર્ષે પણ આ લોકમેળો રાજકોટના હૃદય સમાન ઐતિહાસિક રેસકોર્સ મેદાન ખાતે જ યોજાશે. વિશાળ જગ્યા ધરાવતા આ મેદાનમાં કાયદો અને વ્યવસ્થા જળવાઈ રહે તે માટે સીસીટીવી કેમેરા, ચુસ્ત પોલીસ બંદોબસ્ત, આરોગ્યની ટીમ અને ફાયર સેફ્ટીની પૂરતી સુવિધાઓ ઉભી કરવામાં આવશે, જેથી લોકો કોઈ પણ મુશ્કેલી વગર તહેવારની મોજ માણી શકે.
આ પણ વાંચો - Gujarat Weather Update: 5 સિસ્ટમ સક્રિય થતાં રાજ્યમાં સાર્વત્રિક અને અતિભારે વરસાદની આગાહી, જાણો તમારા જિલ્લાની સ્થિતિ?
