રાજકોટના હુડકો ચોકડી નજીક આવેલા રામ પાર્ક વિસ્તારમાં આજે એક ફેક્ટરીમાં અચાનક ભીષણ આગ લાગતાં સમગ્ર વિસ્તારમાં અફરાતફરીનો માહોલ સર્જાયો હતો. અહીં આવેલા 'ઉત્તમ સોફા' નામના સોફા બનાવવાના કારખાનામાં સવારના સમયે અચાનક ધુમાડા નીકળવા લાગ્યા હતા અને જોતજોતામાં આગની જ્વાળાઓ આખા કારખાનામાં પ્રસરી ગઈ હતી.
સોફા બનાવવાના કારખાનામાં આગ
સોફા બનાવવા માટે વપરાતા મટીરિયલ જેવા કે ફોર્મ, લાકડાં, રેઝિન અને કેમિકલના કારણે આગે અત્યંત રૌદ્ર સ્વરૂપ ધારણ કરી લીધું હતું. ઘટનાની જાણ થતાં જ રાજકોટ ફાયર બ્રિગેડનો કાફલો ઘટનાસ્થળે દોડી ગયો હતો. આગ લાગી ત્યારે કારખાનામાં કામદારો હાજર હતા, જેમાંથી એક શ્રમિક આગ અને ઝેરી ધુમાડાની વચ્ચે ફસાઈ ગયો હતો.
વ્યક્તિની હાલત અત્યંત ગંભીર
ફાયર વિભાગના બહાદુર જવાનોએ ઓક્સિજન માસ્ક અને આધુનિક સાધનોની મદદથી કારખાનાની અંદર પ્રવેશ કર્યો હતો અને ફસાયેલા વ્યક્તિને સહીસલામત બહાર કાઢી રેસ્ક્યુ કર્યો હતો. જોકે, ઝેરી ધુમાડો શ્વાસમાં જવાથી અને દાઝી જવાને કારણે તે વ્યક્તિની હાલત અત્યંત ગંભીર હોવાનું હોસ્પિટલના સૂત્રો જણાવી રહ્યા છે. પ્રાથમિક તપાસમાં કારખાનાના મુખ્ય વીજ બોર્ડમાં શોર્ટ સર્કિટ થવાના કારણે ઠિંગણું પડ્યું હોવાનું સામે આવ્યું છે. હાલમાં ફાયર ફાઈટર્સ દ્વારા વોટર કેનનનો ઉપયોગ કરીને આગને સંપૂર્ણપણે કાબૂમાં લેવાના અને કુલિંગ ઓપરેશન હાથ ધરવાના પ્રયાસો ચાલુ છે.
આ પણ વાંચો: Ahmedabad: ઘર પાસે ઘેરીને તીક્ષ્ણ હથિયારના ઘા ઝીંકાયા, કાયદો અને વ્યવસ્થા સામે પડકાર ફેંકતા હુમલાખોરો
