વિંછીયા તાલુકાના ભોયરા ગામે મોડી રાત્રે દીપડાએ ભારે આતંક મચાવ્યો હતો. રાત્રિના અંધકારનો લાભ ઉઠાવીને અચાનક ત્રાટકેલા દીપડાએ માલધારીના પશુઓ પર પ્રાણઘાતક હુમલો કર્યો હતો. આ ભયાનક હુમલામાં દીપડાએ 6 ઘેટાં અને 1 વાછરડીનું કરૂણ મારણ કર્યું હતું. સવારે ઘટનાની જાણ થતાં જ મોટી સંખ્યામાં માલધારી સમાજના લોકો અને ગ્રામજનો બનાવ સ્થળે દોડી આવ્યા હતા.
વન વિભાગની ટીમ તપાસમાં જોતરાઈ
સ્થાનિકોના જણાવ્યા મુજબ, આ વિસ્તારમાં અગાઉ પણ દીપડો અવારનવાર દેખાઈ ચૂક્યો હતો, પરંતુ યોગ્ય પગલાં ન લેવાતાં આખરે મોટી હોનારત સર્જાઈ છે. બનાવની જાણ થતાં જ વન વિભાગની કાફલો તાત્કાલિક ઘટનાસ્થળે દોડી આવ્યો હતો. વનકર્મીઓએ મૃત પશુઓનું પંચનામું કરી દીપડાના પગમાર્ક આધારે તેની હિલચાલ ટ્રેક કરવાની તજવીજ હાથ ધરી છે.