ભાઈ-બહેનના અતૂટ પ્રેમ અને સ્નેહના પ્રતીક સમાન પવિત્ર તહેવાર 'ભાઈબીજ' નિમિત્તે રાજકોટ મહાનગરપાલિકા (RMC) દ્વારા શહેરની તમામ બહેનો માટે અત્યંત આનંદદાયક અને સંવેદનશીલ ભેટની જાહેરાત કરવામાં આવી છે. ભાઈબીજના પાવન અવસરે બહેનો પોતાના ભાઈના ઘેર સુખરૂપ, સરળતાથી અને કોઈ પણ પ્રકારના આર્થિક ખર્ચ વગર પહોંચી શકે તે હેતુથી રાજકોટ મહાનગરપાલિકા સંચાલિત તમામ સિટી બસ (RMTS) તેમજ BRTS બસોમાં મહિલાઓ માટે આખો દિવસ સંપૂર્ણપણે મફત મુસાફરીની સુવિધા ઉપલબ્ધ કરાવવાનો નિર્ણય લેવામાં આવ્યો છે.
શહેરમાં ગમે ત્યાં જાવ ટિકિટનો કોઈ ખર્ચ નહીં
ભાઈબીજના દિવસે વહેલી સવારની પ્રથમ બસથી લઈને રાત્રિની આખરી સેવા સુધી મહિલા મુસાફરો પાસેથી કોઈપણ પ્રકારનું ટિકિટ ભાડું વસૂલવામાં આવશે નહીં. રાજકોટ રાજપથ લિમિટેડ દ્વારા સંચાલિત 150 ફૂટ રિંગ રોડ પર દોડતી તમામ BRTS બસો તેમજ શહેરના તમામ આંતરિક અને છેવાડાના વિસ્તારોને જોડતી સિટી બસોમાં આ સુવિધા ઉપલબ્ધ રહેશે. શહેરના કોઈપણ ખૂણેથી ગમે તે સ્થળે જવા માટે બહેનો જેટલી વાર ઈચ્છે તેટલી વાર આ વિનામૂલ્યે મુસાફરીનો લાભ ઉઠાવી શકશે.