રાજકોટ શહેરમાં લોકોના આરોગ્ય સાથે ચેડાં કરતા ખાદ્યપદાર્થોના ભેળસેળિયા વેપારીઓ સામે રાજકોટ SOG (સ્પેશિયલ ઓપરેશન ગ્રુપ) પોલીસે લાલ આંખ કરી છે. SOG ની ટીમે રાજકોટના કેવડાવાડી વિસ્તારમાં આવેલી ‘વોલ્ગા ઘી’ નામની જાણીતી દુકાનમાં આકસ્મિક દરોડો પાડીને મોટા પ્રમાણમાં શંકાસ્પદ અને ભેળસેળયુક્ત ઘીનો જથ્થો ઝડપી પાડ્યો છે.
કેવડાવાડી વિસ્તારમાં ભેળસેળયુક્ત ઘીનો જથ્થો ઝડપી પાડ્યો
પોલીસ તપાસ દરમિયાન સ્થળ પરથી 500 કિલોથી પણ વધુ પ્રમાણમાં શંકાસ્પદ ભેળસેળયુક્ત ઘી મળી આવ્યું હતું. આ ઘીના જથ્થામાં વનસ્પતિ ઘી અને અન્ય શંકાસ્પદ પદાર્થોનું મિશ્રણ કરીને તેને ગાય તથા અન્ય પશુઓના શુદ્ધ દેશી ઘીના નામે ગ્રાહકોને ઊંચા ભાવે વેચવામાં આવતું હોવાનો ચોંકાવનારો પર્દાફાશ થયો છે.દરોડા દરમિયાન દુકાન/પેઢીના સંચાલક વેપારી કેવલ જયપ્રકાશ ચંદાણી હાજર મળી આવ્યા હતા. SOG પોલીસે તાત્કાલિક રાજકોટ મહાનગરપાલિકા (RMC) ના આરોગ્ય અને ફેક્ટરી ઇન્સ્પેક્શન વિભાગને બનાવ અંગે જાણ કરી સ્થળ પર બોલાવ્યા હતા.