Rajkot: જાણીતા હિસ્ટ્રીશીટરને વડોદરા ક્રાઈમ બ્રાન્ચે ઝડપી પાડ્યો, આરોપી પાસેથી પિસ્તોલ મળી આવી

રાજકોટના જાણીતા હિસ્ટ્રીશીટર અજય પરસોન્ડાને વડોદરા ક્રાઈમ બ્રાન્ચે ચેઇન સ્નેચિંગના ગુનામાં ઝડપી પાડ્યો છે. આ આરોપી રાજકોટથી વડોદરા આવીને ગુના આચરતો હતો અને પોલીસને લાંબા સમયથી તેની શોધ હતી. તેની ધરપકડથી વડોદરામાં ચેઇન સ્નેચિંગના કેટલાક ગુનાઓનો ભેદ ઉકેલાયો છે. આરોપી અજય પરસોન્ડા રાજકોટના પોલીસ ચોપડે લૂંટ અને ખંડણી જેવા ગંભીર ગુનાઓ સહિત કુલ 25 ગુનાઓમાં સંડોવાયેલો છે. પોલીસના જણાવ્યા મુજબ, તે રાજકોટમાં ગુનાહિત પ્રવૃત્તિઓ કર્યા બાદ વડોદરામાં આશ્રય લેતો હતો અને અહીં પણ ચેઇન સ્નેચિંગ જેવા ગુનાઓ આચરતો હતો.

રાજકોટના હિસ્ટ્રીશીટરની ધરપકડ 

તાજેતરમાં, 8 સપ્ટેમ્બરના રોજ, વડોદરામાં બે વૃદ્ધ મહિલાઓના ગળામાંથી ચેઇન સ્નેચિંગની ઘટના બની હતી. આ ગુનામાં પણ અજય પરસોન્ડાની સંડોવણી હોવાનું પોલીસ તપાસમાં બહાર આવ્યું હતું. વડોદરા ક્રાઈમ બ્રાન્ચે મળેલી બાતમીના આધારે જાંબુઆ વિસ્તારમાંથી અજય પરસોન્ડાને ઝડપી પાડ્યો હતો.આરોપીની ધરપકડ બાદ પોલીસે તેની પાસેથી એક પિસ્તોલ પણ કબજે કરી છે.

આરોપી સામે રાજકોટમાં લૂંટ,ખંડણીના 25 ગુના

આ પિસ્તોલનો ઉપયોગ તેણે ગુના આચરવા માટે કર્યો હતો કે કેમ, તે અંગે વધુ તપાસ હાથ ધરવામાં આવી છે. આ ધરપકડથી વડોદરા પોલીસને મોટી સફળતા મળી છે અને શહેરમાં ચેઇન સ્નેચિંગ જેવી ઘટનાઓ પર અંકુશ લાવવામાં મદદ મળશે.પોલીસે આરોપીની વધુ પૂછપરછ શરૂ કરી છે જેથી તેની સાથે સંકળાયેલા અન્ય ગુનાઓ અને તેના સાગરિતો વિશે માહિતી મળી શકે. રાજકોટના કુખ્યાત ગુનેગારની વડોદરામાંથી થયેલી આ ધરપકડ સ્થાનિક પોલીસ માટે એક મોટી સિદ્ધિ છે.