ટેક્સટાઇલ હબ ગણાતા સુરત શહેરના સારોલી વિસ્તારમાં આવેલા કાપડના વેપારી સાથે લાખો રૂપિયાની છેતરપિંડીનો કિસ્સો પ્રકાશમાં આવ્યો છે. પશ્ચિમ બંગાળના હાવડા ખાતે કાપડનો વેપાર કરતા એક વેપારીએ સારોલીના કાપડ વેપારીનો સંપર્ક કરીને કાપડનો માલ ખરીદવાનું શરૂ કર્યું હતું.
પશ્ચિમ બંગાળના વેપારીએ 25.07 લાખની છેતરપિંડી આચરી
શરૂઆતના તબક્કે હાવડાના વેપારીએ સુરતના વેપારીનો પૂર્ણ વિશ્વાસ સંપાદિત કરવા માટે મંગાવેલા કાપડના જથ્થાનું પેમેન્ટ સમયસર ચુકવી દીધું હતું. વેપારી સંબંધો ગાઢ બનતાં જ હાવડાના વેપારીએ સુરતના વેપારી પાસેથી કુલ રૂ. 25.07 લાખની કિંમતનો મોટો કાપડનો જથ્થો મંગાવ્યો હતો. રૂ. 25.07 લાખનો કાપડનો જથ્થો હાવડા પહોંચી ગયા બાદ જ્યારે સુરતના વેપારીએ તેના પેમેન્ટ માટે ઉઘરાણી શરૂ કરી ત્યારે હાવડાનો વેપારી વાયદાઓ કરવા લાગ્યો હતો.