કેન્દ્રીય ગૃહમંત્રી અમિત શાહે અમદાવાદના નારણપુરા ખાતે વીર સાવરકર સ્પોર્ટ્સ કૉમ્પ્લેક્સનું લોકાર્પણ કર્યું. આ કોમ્પ્લેક્સ 21 એકરના ખાલી પ્લોટ પર 825 કરોડના ખર્ચે તૈયાર થયું છે. આ પ્રસંગે અમિત શાહે જણાવ્યું કે, આ કોમ્પ્લેક્સ માત્ર ઈમારત નથી, પરંતુ તે ભારતના રમત-ગમત ક્ષેત્રમાં એક નવી ક્રાંતિ લાવશે. તેમણે કહ્યું કે, સ્પોર્ટ્સ એ દેશનો આત્મા છે અને વિશ્વમાં સૌપ્રથમ રમત-ગમતની શરૂઆત ભારતમાં થઈ હતી. મોદી સરકાર છેલ્લા 10 વર્ષમાં માત્ર યોજનાઓ જ નહિ, પણ ખેલાડીઓને મોટું પ્લેટફોર્મ પણ આપી રહી છે. આ કોમ્પ્લેક્સમાં ખેલાડીઓ માટે શ્રેષ્ઠ ટ્રેનિંગ, રહેવાની વ્યવસ્થા, કોચિંગ સ્ટાફ અને ડોક્ટર્સની પણ સુવિધા ઉપલબ્ધ છે, જે તેને વિશ્વના સૌથી આધુનિક સ્પોર્ટ્સ કોમ્પ્લેક્સમાંનું એક બનાવે છે.
ખેલ જગતમાં મોદી સરકારનું યોગદાન
અમિત શાહે પોતાના સંબોધનમાં ભારતના ખેલ જગતમાં આવેલા પરિવર્તનની વાત કરી. તેમણે જણાવ્યું કે, 2014 પહેલા ખેલાડીઓ માટેનું બજેટ માત્ર 1643 કરોડ રૂપિયા હતું, જે હવે મોદી સરકારે વધારીને 5300 કરોડ રૂપિયા કર્યું છે. આના પરિણામે છેલ્લા 8 વર્ષમાં ભારતે 15 ઓલિમ્પિક મેડલ જીત્યા છે. આ કોમ્પ્લેક્સને વીર સાવરકરને શ્રદ્ધાંજલિ સમાન ગણાવતા તેમણે કહ્યું કે, વીર સાવરકરે સૌથી લાંબુ સ્વિમિંગ કરીને દેશ માટે પ્રેરણા આપી હતી અને આ કોમ્પ્લેક્સમાં તાલીમ લઈ ખેલાડીઓ ભારત માટે મેડલ જીતશે. આ કોમ્પ્લેક્સ 1.19 લાખ સ્ક્વેર મીટરમાં ફેલાયેલું છે અને તેમાં 900 વાહનો પાર્ક કરવાની વ્યવસ્થા છે, જે તેને સુવિધાજનક બનાવે છે.
