સુરતને સામાન્ય રીતે ડાયમંડ અને ટેક્સટાઇલ સિટી તરીકે ઓળખવામાં આવે છે, પરંતુ હવે સુરતે કૃષિ વ્યવસાય ક્ષેત્રે પણ સમગ્ર દેશમાં પોતાની અનોખી ઓળખ ઊભી કરી છે. ગુજરાત સરકારના કૃષિ અને સહકાર વિભાગના લેટેસ્ટ ઓડિટ રિપોર્ટ અનુસાર, સુરત એપીએમસી (APMC) એ રાજ્યની અન્ય તમામ ૨૨૪ બજાર સમિતિઓને પછાડીને સતત ત્રીજા વર્ષે નંબર-1 નું સ્થાન હાંસલ કર્યું છે. સહારા દરવાજા અને ત્યારબાદ કટોદરા ખાતે વિસ્તરેલું સુરતનું આ માર્કેટ યાર્ડ હવે આધુનિક ગ્લોબલ ટ્રેડિંગ સેન્ટર બની ગયું છે.
4000 કરોડનું ટર્નઓવર અને ટેક્સ મેનેજમેન્ટ
નાણાકીય વર્ષ 2025-26દરમિયાન વહીવટી પારદર્શિતા અને માર્કેટ ફી ના સચોટ કલેક્શનના કારણે સુરત APMC ની સત્તાવાર આવક 51.09કરોડ રૂપિયા પર પહોંચી ગઈ છે, જે અત્યાર સુધીના ઇતિહાસમાં સૌથી વધુ છે. આ યાર્ડમાં રોજિંદા હજારો ટન શાકભાજી, ફળો અને અનાજની આવક થાય છે, જેના કારણે તેનું વાર્ષિક ટર્નઓવર 4000 કરોડ રૂપિયાની સપાટીને વટાવી ગયું છે. દક્ષિણ ગુજરાતના ખેડૂતો ઉપરાંત મહારાષ્ટ્ર, મધ્ય પ્રદેશ અને રાજસ્થાનના ખેડૂતો પણ પોતાના માલના સાચા દામ મેળવવા માટે સુરત એપીએમસી પર સૌથી વધુ ભરોસો મૂકે છે.
