સુરત શહેરના ડભોલી વિસ્તારમાં આવેલા એક જાણીતા કોમર્શિયલ કોમ્પ્લેક્સમાં લિફ્ટ ખોટકાઈ જવાની ગંભીર ઘટના સામે આવી છે. ડભોલી સ્થિત 'ધારા અરમોડા બિઝનેસ હબ' ખાતે આવેલી લિફ્ટ અચાનક ટેકનિકલ ખામીના કારણે અધવચ્ચે બંધ પડી ગઈ હતી. લિફ્ટ અટકી જતાં તેમાં સવાર 12 જેટલા લોકો અંદર જ ફસાઈ ગયા હતા.
લિફ્ટ અટકી જતાં અંદર હાજર 12 લોકો ગભરાઈ ગયા હતા અને બૂમાબૂમ કરી હતી. કોમ્પ્લેક્સના સિક્યુરિટી સ્ટાફ અને સ્થાનિક લોકોએ પ્રાથમિક પ્રયાસો કર્યા બાદ તાત્કાલિક સુરત ફાયર કંટ્રોલ રૂમને જાણ કરી હતી. ફાયર વિભાગના જવાનો વિશેષ સાધનો સાથે ગણતરીની મિનિટોમાં સ્થળ પર પહોંચ્યા હતા. તેમણે લિફ્ટના દરવાજાને સાવચેતીપૂર્વક ઓપરેટ કરી અંદર ફસાયેલા તમામ 12 લોકોને એક પછી એક હેમખેમ બહાર કાઢ્યા હતા. સમયસર રેસ્ક્યુ ઓપરેશન પાર પડતાં મોટી દુર્ઘટના ટળી હતી અને કોઈને સામાન્ય ઈજા પણ પહોંચી નથી.