સુરત શહેરના ગોડાદરા વિસ્તારમાં કાયદો અને વ્યવસ્થાના લીરેલીરા ઉડાવતી એક ચોંકાવનારી ઘટના સામે આવી હતી. રસ્તા પરથી પસાર થતી વખતે માત્ર હોર્ન મારવા જેવી તદ્દન નજીવી બાબતે બે પક્ષો વચ્ચે બોલાચાલી થઈ હતી. આ સામાન્ય ઝઘડો જોતજોતામાં લોહિયાળ ખેલમાં ફેરવાઈ ગયો હતો. એક પક્ષના માથાભારે યુવકોએ પોતાના અન્ય સાગરીતોને હથિયારો સાથે ઘટનાસ્થળે બોલાવી લીધા હતા અને સમગ્ર વિસ્તારમાં આતંક મચાવવાનું શરૂ કર્યું હતું.

સુરતમાં ગુંડાઓનો ખાતમો

આ આરોપીઓ હાથમાં તલવાર, પાઇપ અને છરા જેવા ઘાતક હથિયારો લઈને ફરિયાદીના ઘર પાસે ધસી આવ્યા હતા અને તેમના પર જીવલેણ હુમલો કરી દીધો હતો. ફરિયાદીને બચાવવા વચ્ચે પડેલા સ્થાનિકોને પણ આરોપીઓએ હથિયારો બતાવીને ડરાવ્યા હતા. એટલું જ નહીં, આસપાસના લોકોમાં ભયનો માહોલ પેદા કરવા માટે રસ્તા પર અને સોસાયટીના કમ્પાઉન્ડમાં પાર્ક કરેલી અનેક મોટરસાયકલ અને ફોર-વ્હીલર વાહનોમાં લાકડીઓ અને હથિયારો વડે બેફામ તોડફોડ કરી મોટું નુકસાન પહોંચાડ્યું હતું. આ ગુંડાગર્દીના દ્રશ્યો સીસીટીવી કેમેરામાં પણ કેદ થયા હતા.

આતંક મચાવનાર 7 મુખ્ય સાગરીતોને દબોચી લીધા

ઘટનાની ગંભીરતાને ધ્યાનમાં રાખીને સુરત પોલીસ કમિશનરની સૂચનાથી ગોડાદરા પોલીસ અને ક્રાઈમ બ્રાન્ચની ટીમો તુરંત એક્શનમાં આવી હતી. પોલીસે સીસીટીવી ફૂટેજ અને સ્થાનિક બાતમીદારોના આધારે તપાસના ચક્રો ગતિમાન કરીને આ આતંક મચાવનારી ટોળકીના 7 મુખ્ય સાગરીતોને રાતોરાત દબોચી લીધા છે. પોલીસે તેમની પાસેથી હુમલામાં વપરાયેલા હથિયારો પણ જપ્ત કર્યા છે. સ્થાનિક રહીશોમાં પોલીસ પ્રત્યે વિશ્વાસ વધે તે માટે પકડાયેલા ગુંડાઓને જેલ ભેગા કરતા પહેલાં કાયદાનું ભાન કરાવવામાં આવ્યું છે અને તેમની સામે આકરા કાનૂની પગલાં ભરવાની તજવીજ હાથ ધરાઈ છે.

આ પણ વાંચો: Vadodara: પેટાચૂંટણી અગાઉ ચૂંટણી પંચની ગાઇડલાઇન હેઠળ 2 ACP અને 7 PSI ની સાગમટે બદલી