રાજ્યના નાયબ મુખ્યમંત્રી હર્ષ સંઘવીએ સુરત શહેરની ખાસ શુભેચ્છા મુલાકાત લીધી હતી. આ મુલાકાત દરમિયાન તેમણે સ્થાનિક વહીવટી તંત્ર અને પોલીસ વિભાગના ઉચ્ચ અધિકારીઓ સાથે સીધો સંવાદ સાધ્યો હતો. તહેવારોના માહોલમાં શહેરની આંતરિક વ્યવસ્થા જળવાઈ રહે અને તંત્ર સુચારૂ રીતે કાર્ય કરે તે માટે આ મુલાકાત અત્યંત મહત્વપૂર્ણ માનવામાં આવી રહી છે.
વહીવટી તંત્ર અને પોલીસ અધિકારીઓ સાથે હાઇલેવલ બેઠક
પોતાના પ્રવાસ દરમિયાન નાયબ મુખ્યમંત્રીએ સુરત મહાનગરપાલિકા કમિશનર, જિલ્લા કલેક્ટર તેમજ સુરત પોલીસના ઉચ્ચ અધિકારીઓ સાથે તબક્કાવાર બેઠકો યોજી હતી. આ શુભેચ્છા બેઠકમાં શહેરના સમગ્ર વહીવટી માળખાની કામગીરીની સમીક્ષા કરવામાં આવી હતી. તમામ વિભાગો વચ્ચે પરસ્પર સંકલન જળવાઈ રહે તે માટે નાયબ મુખ્યમંત્રીએ ખાસ ભાર મૂક્યો હતો.
તમામ અધિકારીઓને દિવાળીની શુભકામનાઓ પાઠવી
આગામી તહેવારોને ધ્યાનમાં રાખીને DyCM હર્ષ સંઘવીએ સુરત મનપા, કલેક્ટર કચેરી અને પોલીસ તંત્રના અધિકારીઓ તથા કર્મચારીઓને દિવાળીની હાર્દિક શુભેચ્છાઓ પાઠવી હતી. તેમણે રાજ્યની સેવા અને સુરક્ષા માટે નિષ્ઠાપૂર્વક ફરજ બજાવતા તમામ કર્મચારીઓના સમર્પણને બિરદાવ્યું હતું.
શહેરની સુરક્ષા વ્યવસ્થા મજબૂત કરવા માર્ગદર્શન
સુરત એક મોટું અને ઝડપથી વિકસતું ઔદ્યોગિક શહેર હોવાથી અહીંની સુરક્ષા વ્યવસ્થા અત્યંત સંવેદનશીલ અને મહત્વની છે. નાયબ મુખ્યમંત્રીએ આગામી દિવસોમાં સુરત શહેરની સુરક્ષા વધુમાં વધુ મજબૂત કરી શકાય તે માટે પોલીસ અધિકારીઓને વિશેષ માર્ગદર્શન પૂરું પાડ્યું હતું. નાઇટ પેટ્રોલિંગ વધારવા અને ટેક્નોલોજીના ઉપયોગથી 24x7 સુરક્ષા સુનિશ્ચિત કરવા સૂચના આપવામાં આવી છે.
લોકહિત અને વિકાસના કાર્યોને પ્રાધાન્ય આપવા સૂચના
નાયબ મુખ્યમંત્રીએ મનપા કમિશનર અને કલેક્ટરને સામાન્ય નાગરિકોની સુવિધા અને શહેરના સારામાં સારા લોકહિત માટે કામ કરવાની સ્પષ્ટ સૂચનાઓ આપી હતી. પ્રજાકીય પ્રશ્નોનો ઉકેલ ઝડપથી આવે અને 100% સરકારી યોજનાઓનો લાભ છેવાડાના માનવી સુધી પહોંચે તે માટે વહીવટી તંત્રને સક્રિય રહીને કાર્યરત રહેવા માર્ગદર્શન આપ્યું હતું.
આ પણ વાંચો: Explainer: દિવાળી અને બેસતા વર્ષ વચ્ચે કેમ આવે છે 'ધોકો'?
