નવરાત્રિ દરમિયાન મોટા-મોટા ગરબા આયોજનોમાં ગ્રાહકોને પીરસવામાં આવતી ખાદ્ય વસ્તુઓની ગુણવત્તા તપાસવા માટે પાલિકાના આરોગ્ય વિભાગની ટીમે છેલ્લા બે દિવસમાં અલગ-અલગ સ્થળો પર કાર્યવાહી કરી હતી.જેમાં યશસ્વી નવરાત્રિ, ગુજરાત ગરબા ગેલેક્સી, ઓઝી નવરાત્રિ, ગરબી વારસો, સુવર્ણ નવરાત્રિ અને કેસરિયા નવરાત્રિ આયોજનોમાં 116 ફૂડ સ્ટોલ પર પાલિકાની ટીમે તપાસ કરી હતી અને 113 સેમ્પલ લીધા હતા.
તપાસમાં 113 ફૂડ સેમ્પલ લેવામાં આવ્યા
તમામ સેમ્પલ લેબોરેટરીમાં મોકલી અપાયા હતા,જેનો રિપોર્ટ આવ્યા બાદ આગળની કાર્યવાહી હાથ ધરાશે.નવરાત્રિ ટાણે મોડીરાત સુધી લોકો ગરબાના તાલે ઘૂમે છે અને ભક્તિ અર્ચના કરે છે,ત્યારે ખાણીપીણીની સંસ્થાઓ પર લોકોની ભારે ભીડ હોય છે.જેનો ગેરલાભ કેટલાક લોભિયા વેપારીઓ લે છે અને લોકોના સ્વાસ્થ્ય માટે જોખમકારક હોય તેવી ભેળસેળવાળી વસ્તુઓ પણ પીરસી દે છે.ગત વર્ષોના અનુભવના આધારે આરોગ્ય વિભાગે શહેરના તમામ મોટા નવરાત્રિ આયોજનોમાં ફૂડ સ્ટોલ પર તપાસ કરી હતી.કુલ 116 સ્થળો પર કરવામાં આવેલી તપાસમાં 113 ફૂડ સેમ્પલ લેવામાં આવ્યા હતા.