ડાયમંડ અને ટેક્સટાઇલ સિટી સુરતનું ઇન્ટરનેશનલ એરપોર્ટ હવે દાણચોરો માટે સોફ્ટ ટાર્ગેટ બની રહ્યું હોય તેમ લાગી રહ્યું છે, પરંતુ સુરક્ષા એજન્સીઓની બાજ નજર સામે તસ્કરોની ચાલબાજી નિષ્ફળ સાબિત થઈ રહી છે. સુરત ઇન્ટરનેશનલ એરપોર્ટ પર ડિરેક્ટોરેટ ઓફ રેવન્યુ ઈન્ટેલિજન્સ (DRI) ની ટીમે એક મોટી સફળતા હાંસલ કરતાં દુબઈથી આવી રહેલી ફ્લાઈટમાંથી ગેરકાયદે રીતે લાવવામાં આવેલું 480 ગ્રામ સોનું ઝડપી પાડ્યું છે. આંતરરાષ્ટ્રીય બજાર અને સ્થાનિક મૂલ્ય મુજબ જપ્ત કરાયેલા આ કિંમતી સોનાની અંદાજિત કિંમત રૂપિયા 68 લાખ આંકવામાં આવી છે. ડીઆરઆઈએ સોનું લાવનાર મુસાફરને અટકમાં લઈ તેની સામે કસ્ટમ્સ એક્ટ હેઠળ કડક કાનૂની કાર્યવાહી હાથ ધરી છે.
દુબઈથી સુરત આવતી ફ્લાઈટમાં સવાર હતો દાણચોર
દુબઈથી સુરત ઇન્ટરનેશનલ એરપોર્ટ પર લેન્ડ થયેલી નિયમિત પેસેન્જર ફ્લાઈટના મુસાફરોનું ઇમિગ્રેશન અને કસ્ટમ્સ સ્ક્રિનિંગ ચાલી રહ્યું હતું.આ દરમિયાન ગુપ્ત બાતમી તેમજ શંકાસ્પદ હિલચાલના આધારે DRI ની ટીમે એક ચોક્કસ મુસાફરને અટકાવીને તેની સઘન તલાશી લીધી હતી.મુસાફરના સામાન અને શરીરની ચકાસણી દરમિયાન તેમાંથી ગુપ્ત રીતે છુપાવેલું 480 ગ્રામ શુદ્ધ સોનું મળી આવ્યું હતું, જે અંગે મુસાફર પાસે કોઈ બિલ કે કાયદેસરના દસ્તાવેજો નહોતા.