Suratમાં જન્માષ્ટમીની કરવામાં આવી ભવ્ય ઉજવણી, 45 ફૂટ ઊંચી મટકી ફોડવા ગોવિંદા મંડળોનો અનેરો ઉત્સાહ જોવા મળ્યો

સુરત શહેરમાં જન્માષ્ટમીના તહેવારની ભવ્ય ઉજવણીનો માહોલ જામ્યો હતો. શહેરના જુદા જુદા ચાર જેટલા વિસ્તારોમાં મટકી ફોડના કાર્યક્રમોનું આયોજન કરવામાં આવ્યું હતું. કાર્યક્રમમાં કેન્દ્રીય મંત્રી સી.આર.પાટીલ પણ હાજર રહ્યા હતા. જેમાં ખાસ કરીને મોટાભાગળ ખાતે યોજાયેલો દહીં હાંડીનો કાર્યક્રમ આકર્ષણનું કેન્દ્ર બન્યું હતું. તાપી નામોસ્તુભ્યમ અને યુથ ફોર ગુજરાત દ્વારા આયોજિત આ કાર્યક્રમમાં કેન્દ્રીય મંત્રી અને પ્રદેશ ભાજપ અધ્યક્ષ સી.આર. પાટીલ ખાસ ઉપસ્થિત રહ્યા હતા.

અલગ અલગ 36 જેટલા ગોવિંદા મંડળોએ ભાગ લીધો

કાર્યક્રમમાં ભાગ લેવા માટે શહેરના જુદા જુદા 36 ગોવિંદા મંડળોએ નામ નોંધાવ્યા હતા. આ વખતે એક મહિલા મંડળે પણ મટકી ફોડવા માટે નામ નોંધાવીને ઉત્સાહભેર ભાગ લીધો હતો. જે એક સકારાત્મક પહેલ છે. મોટાભાગળ ખાતે 45 ફૂટ ઊંચી મટકી ફોડવાનું આયોજન કરવામાં આવ્યુ હતું. મટકીને ક્રેનની મદદથી ઊંચે લટકાવવામાં આવી હતી. આ મટકીની આસપાસ સુંદર લાઇટિંગ અને ફુવારા પણ ગોઠવવામાં આવ્યા હતા. જેના કારણે સમગ્ર કાર્યક્રમની શોભા વધી હતી.

મટકી ફોડવા માટે 1.25 લાખ ઇનામની જાહેરાત

આ મટકી ફોડનાર ગોવિંદા મંડળને રૂપિયા 1.25 લાખનું મોટું ઇનામ આપવાની જાહેરાત કરવામાં આવી હતી. આ કાર્યક્રમને જોવા માટે મોટી સંખ્યામાં લોકોની ભીડ ઉમટી પડી હતી. લોકો ગોવિંદા મંડળોનો ઉત્સાહ વધારવા માટે નારા લગાવી રહ્યા હતા. સમગ્ર માહોલ ભક્તિ અને ઉત્સાહથી ભરપૂર હતો. આ પ્રકારના આયોજનોથી તહેવારોની પરંપરા જીવંત રહે છે અને લોકોમાં એકતાની ભાવના પણ વધે છે.