સુરતના વરાછા વિસ્તારના ધારાસભ્ય અને રાજ્યના પૂર્વ આરોગ્ય મંત્રી કિશોર (કુમાર) કાનાણી ફરી એકવાર જનહિત અને લોકોના આરોગ્યના મુદ્દે મેદાને આવ્યા છે. ફ્રોઝન ડેઝર્ટના ઉત્પાદન, વેચાણ અને તેના પર લગાવવામાં આવતા લેબલના મુદ્દે કિશોર કાનાણીએ આરોગ્ય અને પરિવાર કલ્યાણ વિભાગના અગ્ર સચિવને પત્ર લખ્યો છે. તેમણે રાજ્યમાં ફ્રોઝન ડેઝર્ટના ઉત્પાદન અને વેચાણ પર સંપૂર્ણ પ્રતિબંધ મૂકવાની માંગ કરવાની સાથે આરોગ્ય વિભાગ સમક્ષ 5 મહત્વના સવાલો ઉઠાવ્યા છે.

'ઓપરેશન હેલ્થ'ને આવકાર્યું, રાજ્યવ્યાપી જાગૃતિ લાવવાની કરી માંગ

રાજ્યના આરોગ્ય વિભાગ દ્વારા રિયલ આઈસ્ક્રીમ અને ફ્રોઝન ડેઝર્ટ વચ્ચેનો તફાવત ગ્રાહકોને સમજાવવા માટે શરૂ કરવામાં આવેલા 'ઓપરેશન હેલ્થ' અભિયાનને ધારાસભ્ય કિશોર કાનાણીએ આવકાર્યું છે. આ સાથે જ તેમણે રિયલ આઈસ્ક્રીમ અને ફ્રોઝન ડેઝર્ટ વચ્ચે શું તફાવત છે તે સામાન્ય ગ્રાહકો સરળતાથી સમજી શકે તે માટે રાજ્યવ્યાપી જનજાગૃતિ અભિયાન ચલાવવાની માંગ કરી છે, જેથી લોકો છેતરામણીનો ભોગ ન બને.

અગ્ર સચિવને પત્ર લખીને ઉઠાવેલા મુખ્ય સવાલો

પૂર્વ આરોગ્ય મંત્રી કુમાર કાનાણીએ આરોગ્ય વિભાગના અગ્ર સચિવને લખેલા પત્રમાં 5 મુખ્ય મુદ્દાઓ પર સ્પષ્ટતા માંગી છે, જેમાં નીચેના મહત્વના સવાલોનો સમાવેશ થાય છે. લોકોના સ્વાસ્થ્યને ધ્યાનમાં રાખીને ફ્રોઝન ડેઝર્ટના ઉત્પાદન અને વેચાણ પર સંપૂર્ણ પ્રતિબંધ કેમ ન મૂકવો જોઈએ? જો એક જ પાર્લર કે દુકાનમાં રિયલ આઈસ્ક્રીમ અને ફ્રોઝન ડેઝર્ટ એમ બંને પ્રોડક્ટ વેચાતી હોય, તો તે દુકાનનું નામ શું રાખવું? લગ્નપ્રસંગો અને સામાજિક મેળાવડાઓમાં મોટા પાયે ફ્રોઝન ડેઝર્ટ પીરસવામાં આવે છે, ત્યારે તેની સામે તંત્ર દ્વારા કાર્યવાહી કેવી રીતે કરવામાં આવશે?ધારાસભ્ય કિશોર કાનાણીના આ પત્ર બાદ ફ્રોઝન ડેઝર્ટ અને આઈસ્ક્રીમ વિક્રેતાઓમાં તેમજ વહીવટી તંત્રમાં આ મુદ્દે ભારે ચર્ચા જાગી છે.

આ પણ વાંચો: Mahuva: બગદાણા ગુરુ આશ્રમના ટ્રસ્ટી મંડળમાં કોળી સમાજના સભ્યની નિમણૂકનો મુદ્દો ગરમાયો; આગેવાનોએ એકજૂથ થઈ ઉઠાવ્યો અવાજ