સુરતના નાસીરનગર વિસ્તારમાં તાજેતરમાં વહીવટી તંત્ર દ્વારા હાથ ધરવામાં આવેલી મોટી ડિમોલિશનની ડ્રાઈવ બાદ સેંકડો લોકો બેઘર થઈ ગયા હતા. ચોમાસાની ઋતુ અને આકરી ગરમી-ઉમસ વચ્ચે નાસીરનગરના સ્થાનિક રહીશો કફોડી સ્થિતિમાં આવી જતાં આ મામલો અંતે ગુજરાત હાઈકોર્ટના દ્વારે પહોંચ્યો હતો. માનવતાના ધોરણે હાઈકોર્ટે લીધેલા કડક વલણ બાદ, સુરત મહાનગરપાલિકાના ઉચ્ચ અધિકારીઓએ શનિવારે સવારથી જ અસરગ્રસ્તો માટે વ્યાપક રાહત અને પુનર્વસન ઓપરેશન શરૂ કરી દીધું છે.
100 પરિવારોને સલામત સ્થળે શિફ્ટ કરાયા
મનપાના સેન્ટ્રલ ઝોન અને કતારગામ ઝોનના ડેપ્યુટી કમિશનરો અને ઓપરેશનલ સ્ટાફની સીધી દેખરેખ હેઠળ નાસીરનગરના ખુલ્લા પ્લોટમાં આશરો લઈ રહેલા અંદાજે ૧૦૦ જેટલા પરિવારોને મનપાની સત્તાવાર બસો અને વાહનો મારફતે ભરીમાતા ખાતે આવેલા મોટા કોમ્યુનિટી હોલ (શેલ્ટર હોમ) માં ખસેડવામાં આવ્યા છે. નાના બાળકો અને વૃદ્ધોને કોઈ તકલીફ ન પડે તે માટે તંત્ર દ્વારા અગાઉથી જ હોલની અંદર સેંકડો બેડ (ગાદલા), ઓઢવા માટેની ચાદરો અને પંખાઓની યોગ્ય વીજળીક વ્યવસ્થા ગોઠવી દેવામાં આવી હતી. તેમજ અહીં પુરુષો અને મહિલાઓ માટે અલગ-અલગ શૌચાલય અને સ્નાનગૃહ સાફ-સુથરા કરીને ખુલ્લા મૂકાયા છે.
