સુરત મહાનગરપાલિકાની મલ્ટી લેવલ પાર્કિંગ બિલ્ડિંગના કમ્પાઉન્ડમાં ગઈકાલે એકાએક આગ ફાટી નીકળતા તંત્ર અને સ્થાનિક લોકોના શ્વાસ અધ્ધર થઈ ગયા હતા. લાંબા સમયથી બિનવારસી અને બિનઉપયોગી હાલતમાં પાર્ક કરાયેલી એક જૂની કારમાં એકાએક કોઈ કારણસર ધુમાડો નીકળ્યા બાદ લપેટો ઉઠવા લાગી હતી.
રવિવારની રજા આશીર્વાદરૂપ સાબિત થઈ
સામાન્ય દિવસોમાં મિલેનિયમ માર્કેટ અને તેની આસપાસના આ મલ્ટી લેવલ પાર્કિંગમાં હજારો ટુ-વ્હીલર અને ફોર-વ્હીલર ખીચોખીચ પાર્ક થયેલા હોય છે. પરંતુ સદનસીબે ગઈકાલે રવિવાર હોવાથી કાપડ બજાર સત્તાવાર બંધ હતું અને પાર્કિંગ કમ્પાઉન્ડ મોટેભાગે ખાલી હતું. આગ લાગી તે કારની આસપાસ અન્ય કોઈ મોંઘા વાહનો પાર્ક ન હોવાથી આગ અન્ય વાહનોમાં પ્રસરી શકી નહોતી. જો આ ઘટના ચાલુ ચાલુ માર્કેટે કે અઠવાડિયાના સામાન્ય દિવસોમાં બની હોત, તો આગની લપેટમાં અન્ય વાહનો પણ આવી જાત અને પાર્કિંગમાં મોટો બ્લાસ્ટ થવાની ભીતિ રહેતી.
