દક્ષિણ ગુજરાત પર મેઘરાજા મુશળધાર આફત બનીને વરસી રહ્યા છે. હવામાન વિભાગ દ્વારા આગામી સમય માટે જાહેર કરાયેલા ભારે વરસાદના એલર્ટને પગલે સુરત અને નવસારીનું વહીવટી તંત્ર યુદ્ધના ધોરણે સજ્જ થયું છે. સુરત શહેરમાં પણ સવારથી જ અવિરત વરસાદ પડી રહ્યો છે, જેના લીધે લો-લાઈંગ એરિયા (નીચાણવાળા વિસ્તારો) અને ખાડી કાંઠાના વિસ્તારોમાં પૂરનું જોખમ તોળાઈ રહ્યું છે. પરિસ્થિતિની ગંભીરતા સમજીને સુરત મનપા કમિશનર એમ. નાગરાજને મોટો વહીવટી નિર્ણય લીધો છે. તેમણે પોતાની ગાંધીનગરની વીઆઈપી વિઝિટ તુરંત રદ કરી દીધી છે અને મનપાના તમામ સાત ઝોનના અધિકારીઓ તથા કર્મચારીઓને આગામી 48 કલાક સુધી પોતાની ફરજ પર તૈનાત રહેવા અને હેડક્વાર્ટર ન છોડવા કડક આદેશ જારી કર્યા છે.
નવસારીમાં રેડ એલર્ટ વચ્ચે સ્કૂલો-કોલેજોમાં તાળાં
બીજી તરફ, નવસારી જિલ્લામાં સ્થિતિ વધુ ચિંતાજનક હોવાથી હવામાન વિભાગે 'રેડ એલર્ટ' જારી કર્યું છે. પુર્ણા, અંબિકા અને કાવેરી નદીઓમાં ઉપરવાસના કારણે પાણીની સપાટી સતત વધી રહી છે. ગ્રામીણ અને શહેરી વિસ્તારોના માર્ગો પાણીમાં ગરકાવ થતાં વાહનવ્યવહારને માઠી અસર થઈ છે. નાના બાળકો અને વિદ્યાર્થીઓને કોઈ જાનહાની કે મુશ્કેલી ન નડે તે માટે નવસારી જિલ્લા કલેક્ટરે તાકીદની બેઠક બોલાવીને જિલ્લાની તમામ આંગણવાડીઓ, પ્રાથમિક અને માધ્યમિક શાળાઓ, ઉચ્ચ શિક્ષણની કોલેજો તેમજ ITI સંસ્થાઓને સંપૂર્ણપણે બંધ રાખવાનો આદેશ આપ્યો છે. જોકે, વિદ્યાર્થીઓનો અભ્યાસ ન બગડે તે માટે શાળાઓને ઓનલાઇન ક્લાસિસ ચાલુ રાખવાની છૂટ આપવામાં આવી છે.