ખેડૂતો માટે સરકાર દ્વારા અપાતા સબસિડીયુક્ત નીમકોટેડ યુરિયા ખાતરને ખોટા નામે બિલ બનાવી ઔદ્યોગિક વપરાશ માટે સપ્લાય કરવાનું એક મોટું કૌભાંડ સુરતમાં સરકારી કૃષિ વિભાગની ટીમે ઝડપી પાડયું છે.ઉધના બમરોલી રોડ પર આવેલા એક ઔદ્યોગિક એકમ પર દરોડા પાડીને રૂ.119880ની કિંમતનો 405 બેગ સરકારી ખાતરનો જથ્થો સીઝ કરાયો છે.આ મામલે ખટોદરા પોલીસ મથકે દિલ્હી અને સુરતની પેઢીઓ સામે ગુનો નોંધાયો છે.
બેગના જથ્થા અંગે શંકા જતાં સેમ્પલ લેવાયા
પોલીસ સૂત્રોના જણાવ્યા અનુસાર,નાયબ ખેતી નિયામક વિશાલકુમાર કોરાટની સંયુક્ત રકોડ ટીમે ઉધના બમરોલી રોડ સ્થિત આર.એન.ઈન્ટરનેશનલ પેઢીમાં તપાસ કરી હતી.ત્યારે ટેક્નિકલ ગ્રેડ યુરિયાના નામે સંગ્રહ કરાયેલા ગુલાબી રંગની બેગના જથ્થા અંગે શંકા જતાં સેમ્પલ લેવાયા હતા.બારડોલી અને ચેન્નાઈની સરકારી લેબોરેટરીમાં કરાયેલા પરીક્ષણમાં નીમ ઓઈલ પોઝિટિવ આવતા,આ જથ્થો ખેડૂતો માટેનું જ સબસિડીયુક્ત યુરિયા હોવાનું સાબિત થયું હતું.