દક્ષિણ ગુજરાતની આર્થિક જીવાદોરી સમાન અને અબજો રૂપિયાનું વાર્ષિક ટર્નઓવર ધરાવતી સુમુલ ડેરીના સંચાલક મંડળની ચૂંટણીનો રોમાંચ વધી રહ્યો છે. લાંબા સમયના પ્રચાર-પ્રસાર અને રાજકીય ખેંચતાણ બાદ આવતીકાલે સુમુલ ડેરીની બાકી રહેલી 9 બેઠકો માટે લોકશાહી ઢબે મતદાન યોજાવા જઈ રહ્યું છે. સહકારી ક્ષેત્ર પર પોતાનું વર્ચસ્વ જમાવવા માટે ભાજપ અને કોંગ્રેસ પ્રેરિત પેનલો તેમજ અપક્ષ ઉમેદવારોએ એડીચોટીનું જોર લગાવ્યું છે, જેના કારણે આ ચૂંટણી વિધાનસભા જેવી રસાકસી ભરી બની ગઈ છે.
સુમુલ ડેરીના સંચાલક મંડળની ચૂંટણી
ચૂંટણી તંત્રના જણાવ્યા અનુસાર, આવતીકાલે સવારે 9:00 વાગ્યાથી મતદાન મથકો પર પ્રક્રિયા શરૂ થશે જે સાંજે 4:00 વાગ્યા સુધી ચાલશે. આ ચૂંટણીમાં રસપ્રદ આંકડા સામે આવ્યા છે, જેમાં સુરત જિલ્લાની ઓલપાડ બેઠક પર સૌથી ઓછી રસાકસી જોવા મળી શકે છે કારણ કે ત્યાં સૌથી ઓછા માત્ર 42 મતદારો જ નોંધાયેલા છે. તેની સામે આદિવાસી બહુલ વિસ્તાર ધરાવતી તાપી જિલ્લાની સોનગઢ બેઠક પર સૌથી મોટો જંગ ખેલાશે, જ્યાં સૌથી વધુ 176 મતદારો ઉમેદવારોના ભાવીનો ફેંસલો કરશે.