સુરતમાં નબીરાઓ બેફામ બન્યા હોવાનો વધુ એક કિસ્સો સામે આવ્યો છે. અત્યારે વરસાદી સિઝનમાં ડુમસના દરિયામાં ઉંચા મોજા ઉછળતા જોવા મળે છે. ડુમસ બીચ આ દિવસોમાં વધુ આકર્ષક બને છે. તાજેતરમાં જ એક નબીરાને લકઝરી કારનો રોલો પાડવા જતા રોવાનો વારો આવ્યો. મોંઘી કાર લઈ દરિયાના કિનારે લટાર મારવા નીકળેલ નબીરાને સ્ટંટ કરવો ભારે પડ્યો.

નબીરાની દરિયાની લટાર પડી મોંઘી

ડુમસના દરિયા કિનારે લકઝરી કારના એક સ્ટંટનો વાયરલ થયેલ વીડિયો સામે આવ્યો છે. આ વીડિયોમાં દેખાય છે કે મોટી લકઝરી કાર ડુમસ કિનારાની રેતાળ જમીનમાં કેટલી ઉંડી ફસાઈ ગઈ. કિનારા પરની રેતીમાં આ મોંઘી લકઝરીના ટાયર એવા ફસાઈ ગયા કે આ નીબરાએ ગમેતેટલી મહેનત કરી છતાં તેને બહાર કાઢી શકયો નહીં. નબીરાની કાર સાથે દરિયાની લટાર તેને બહુ ભારે પડી. ત્યારે સવાલ એ થાય કે વરસાદી સિઝનમાં દરિયાકિનારા પર સુરક્ષાને લઈને પેટ્રોલિંગ કરવામાં આવતું હોય છે. તો પછી આ શખ્સ આટલી મોટી કાર લઈ દરિયાકિનારા પર કેવી રીતે પ્રવેશ કરી શકયો.

દરિયા કિનારા પર પેટ્રોલિંગના દાવા પોકળ

શહેરના દક્ષિણપશ્ચિમ વિસ્તારમાં આવેલ ડુમસ દરિયાકિનારો હંમેશા પ્રવાસીઓના આકર્ષણનું કેન્દ્ર રહ્યો છે. સૂર્યાસ્તના સમયે આ દરિયાકિનારાનો રમણીય નજારો જોવા મોટાભાગે સ્થાનિકોની ભીડ રહેતી હોય છે. આ દરિયા કિનારાની રેત કાળી છે અને ત્યાં અગાઉ લોકોના અંતિમ સંસ્કાર કરાયા હોવાના કારણે તેને ભુતિયા જગ્યા પણ માનવામાં આવે છે. અને એટલે જ આ કિનારો જોખમી હોવાના કારણે ડુમસના દરિયા કિનારા વિસ્તારમાં ન્હાવા પર પ્રતિબંધ રાખવામાં આવ્યો છે. ત્યારે તાજેતરમાં ડુમ્મસના દરિયા કિનારા પર લકઝરી કાર ફસાઈ હોવાનો વીડિયો સામે આવ્યો છે. જેના બાદ ડુમસના કિનારા પર કરાવામાં આવતા પેટ્રોલિંગના દાવા પોકળ સાબિત થયા.

Also Read